Minn Cristian Muscat
Gzira United ………3
Gudja United………2
Gzira United irritornaw għar-rebħ wara tliet partiti meta għelbu lil Gudja United bl-iskor ta’ 3-2.
Gudja kellhom xejn anqas minn ħames bidliet mill-aħħar logħba tagħhom kontra Floriana hekk kif bdew mal-ewwel ħdax, Neil Tabone, Hubert Vella, Ruslan Kisil, Temitope Abdul u Marcelo Dias. Min-naħa l-oħra, Gzira kellhom bidla waħda b’Luke Tabone jidħol minflok is-sospiż Gabriel Bohrer Mentz.
It-team immexxi minn Thane Micallef ħareġ tajjeb u Temitope Abdul ittanta xortih b’xutt b’saħħtu minn barra l-kaxxa ġie mxellef f’corner minn Radelic Zarkov.
Fis-17-il minuta kontra x-xejra tal-logħob, Gżira fetħu l-iskor meta Maxuell Maia dar ma’ difensur u għadda l-ballun lil Clive Gauci li ra lil JEFFERSON DE ASSIS u qassamlu biex dan għeleb lil Zammit b’ xutt fil-baxx.
Ir-reazzjoni ta’ Gudja damet ftit ma waslet iżda fil-35 minuta, Neil Tabone ħasad lid-difiża ta’ Gżira bi cross li ġie mxellef f’corner. Tliet minuti wara, huma tilfu ċans tad-deheb li jiksbu d-draw meta xutt sabiħ ta’ Beland ġie salvat parzjalment minn Radelic Zarkov u mir-rebound, Aidan Friggieri falla l-mira anke jekk kien waħdu quddiem il-goalkeeper.
Fl-40 minuta, Gżira setgħu għamluhom tnejn meta Gauci fetaħ tajjeb fuq Maxuell Maia iżda l-konklużjoni tiegħu ġiet imdawra f’corner minn Zammit.
Fit-tieni taqsima Gudja United ħarġu aggressivi u fis-47 minuta, minn cross ta’ Dias mil-lemin, Friggieri kien sfortunat li laqat il-mimduda mill-viċin b’xutt mill-ewwel.
Fit-52 minuta, huma rnexxielhom jagħmlu l-iskor 1-1 meta cross ta’ Vella deher li se jiġi salvat minn Radelic Zarkov u pront daħal is-sostitut GABRIEL MENSAH li antiċipa lill-goalkeeper bix-xutt tiegħu jolqot il-wieqfa qabel jispiċċa ġewwa.
Iżda fis-66 minuta, Gżira reġgħu marru minn fuq hekk kif Messias twaqqa’ fil-kaxxa minn Soares u mill-penalty, MAXUELL MAIA ma żbaljax.
Tliet minuti wara, il-Maroons għamluhom 3-1 b’daqqa ta’ ras ta’ MAXUELL MAIA wara free-kick mil-lemin ta’ Pisani.
Gudja baqgħu fil-partita hekk kif seba’ minuti mit-tmiem, minn free-kick ta’ Pankarican mil-lemin, TENSIOR GUSMAN għeleb lill-goalkeeper ta’ Gżira b’daqqa ta’ ras mill-viċin.
GZIRA U.: 30-Darijan Radelic Zarkov, 5-Luke Tabone, 6-Nikolai Musat, 7-Steven Pisani, 8-Zachary Scerri, 11-Yuri Messias, 17-Clive Gauci, 20-Nevin Portelli, 91-Maxuell Maia, 94-Jefferson De Assis (9-Emmanuel Mbong 67), 98-Jackson Mendoza – Coach: Darren Abdilla
GUDJA U.: 1-Glenn Zammit, 5-Louis Beland, 7-Aidan Jake Friggieri, 8-Rodolfo Soares, 11-Filip Pankarican, 19-Ruslan Kisil (17-Gabriel Mensah 46), 22-Hubert Vella (20-Leighton Grech 72), 23-Neil Tabone (18-Kyle Gatt 72), 25-Farid Romero Zuniga (28-Igor Dudarev 46), 92-Temitope Abdul (9-Tensior Gusman 72), 99-Marcelo Dias. – Coach: Thane Micallef
REFEREE: Etienne Mangion
ASS. REFEREES: Alan Camilleri, Paul Apap
RABA’ UFF: Daniel Portelli
SKORERS: J. De Assis 17, M. da Silva Maia 66 pen, 69 (Gz); G. Mensah 52, T. Gusman 83 (Gu)
AMMONITI: J. Mendoza (Gz); R. Soares, I. Dudarev, N. Tabone, T. Gusman, L. Beland (Gu)
