Ilbieraħ filgħodu, fi Triq il-Mitħna l-Mosta, triq li minnhom l-ħin kollu għaddejjin l-karozzi, seħħ każ li seta’ kellu konsegwenzi serji. Siġra matura taż-żnuber, li tinsab eżatt faċċata tal-mitħna li fiha kien jgħix Ċikku Fenech magħruf bħala Ta’ Vanġeli, ċediet u waqgħet proprju f’nofs it-triq.
Is-siġra ċediet weħidha għall-ħabta tal-10:00 a.m. B’xorti tajba dak il-ħin la kienu għaddejjin nies bil-mixi u lanqas vetturi u b’hekk ma weġġa’ ħadd.
Jidher ukoll li l-ebda proprjetà jew vetturi pparkjati ma ġarrbu xi ħsarat. Fuq il-post issejħu l-membri tal-Protezzjoni Ċivili kif ukoll il-Pulizija mill-Għassa tal-Mosta li kkontrollaw is-sitwazzjoni.
