Ħames Kolumbjani li ammettew li ppreżentaw ftehimiet ta’ kirjiet foloz lil Identity Malta biex jiksbu permess ta’ residenza, ingħataw sentenza sospiża mill-Qorti li ordnat ukoll ir-ripatrijazzjoni tagħhom.
Erba’ rġiel u mara tressqu l-Qorti wara li investigazzjonijiet tal-pulizija kkonfermaw li d-dokumenti ppreżentati lill-entità statali kienu foloz.
Fil-Qorti intqal li uffiċjali ta’ Identità, li qabel kienet magħrufa bħala Identity Malta, ġihom suspett meta ġew ippreżentati bil-ftehim ta’ kiri li kollha dehru li kellhom l-istess indirizz. Aktar investigazzjonijiet urew ukoll li s-suspetti tagħhom kienu korretti.
Anderson Pedroza Gutierrez, Carlos Andres Angarita Contreras, Henrique Santos Silva, Jose Ricardo Vanegas Bustamante u Ana Maria Rodriquez Barragan ammettew li għamlu dikjarazzjoni falza biex jiksbu benefiċċju, kif ukoll falsifikazzjoni tad-dokument ippreżentat lill-Identità.
Il-Qorti preseduta mill-Maġistrat Joseph Mifsud, ikkundannat lill-ħames Kolombjani sitt xhur ħabs sospiżi għal sentejn filwaqt li ordnat ir-ripatrijazzjoni tagħhom.
Il-Prosekuzzjoni tmexxiet mill-Ispetturi Jonathan Ransley u Eman Hayman. L-avukati Dustin Camilleri u Simon Micallef Stafrace dehru għall-imputati.
