Ahmad Ali Younes Ikbal, Libjan ta’ 32 sena, ġie kkundannat ħames snin ħabs wara li nstab ħati ta’ korruzzjoni ta’ minorenni fil-konfront ta’ żewġ adolexxenti.
Il-Libjan għadda ġuri, mingħajr ġurati, fuq għażla tiegħu stess quddiem l-Imħallef Aaron Bugeja. Kien fil-11 ta’ Settembru li għadda meta l-akkużat beda għaddej ġuri fejn fost l-oħrajn kien mixli b’korruzzjoni ta’ minorenni.
Fost dawk li xehdu fil-ġuri kien hemm tliet żgħażagħ – ġuvni u żewġ tfajliet li meta seħħ il-każ kellhom 13-il sena u 14-il sena rispettivament.
Il-pulizija bdew jinvestigaw dan il-każ wara li kien daħal rapport mingħand missier it-tifel. Fir-rapport, il-missier kien qal li ibnu kien qallu li kien hemm raġel li sfurzah iwettaq atti indiċenti biex hu (l-akkużat) joqgħod jarah minn fuq il-kompjuter. Fl-istess żmien, waħda mill-ġenituri tal-bniet kienet għamlet rapport lill-pulizija li bintha kienet irċeviet ritratti tal-parti ġenitali tar-raġel.
Min-naħa tal-Prosekuzzjoni, li kienet immexxija mill-Avukat Angele Vella u Danika Vella mill-Uffiċċju tal-Avukat Ġenerali, qalu li l-Libjan kellu fantasiji sesswali bis-saqajn tat-tfal.
L-Imħallef Bugeja sab lir-raġel ħati ta’ korruzzjoni ta’ minorenni fil-konfront taż-żagħżugħ u waħda mit-tfajliet. Huwa kien ikkundannat ħames snin ħabs.
L-Avukat Joe Brincat mexxa d-Difiża f’isem il-Libjan.
