Minn Cristian Muscat
Hamrun Amateurs FC se jkun team ġdid li se jikkompeti fil-kampjonat tat-tielet diviżjoni tal-MAFA. Din hi avventura ġdida li se tibda dalwaqt hekk kif jiftaħ l-istaġun 2022/2023 u hija ħolma tal-aħwa Jurgen u Kurt Buhagiar li prattikament ilhom jaħdmu għaliha għal dawn l-aħħar sena u nofs.
Talk.mt tkellem mal-president u l-coach ta’ dan it-team Jurgen Buhagiar li jinsab ferm eċitat għal din l-isfida affaxxinanti li għandu. Iżda kif oriġinat din l-idea li jiffurmaw team?
“Bħal kull player ieħor, aħna nilagħbu football 5-a-side jew inkella 7-a-side. Jien u ħija minn dejjem attivi f’dan l-isport u għalhekk dejjem naraw kif se nagħmlu sabiex nivvintaw xi ħaġa. Darba fost l-oħrajn iddeċidejna li niffurmaw tim li jirrappreżenta lil Ħamrun. Kif nafu l-Ħamrun u l-football jamalgamaw flimkien u għalhekk iddeċidejna li din l-idea mmexxuha ‘l quddiem.”
“L-entużjażmu hu wieħed kbir u iktar ma jgħaddi ż-żmien, iktar jiżdied l-eċitament għal din l-avventura ġdida li se tibda.”
“B’xorti tajba, l-idea mxiet ‘il quddiem u bdejna t-tfittxija tagħna għall-isponsors li wara kollox huma ferm importanti minħabba l-finanzi. Sadanittant riċentement ingħaqad magħna Ramon Vella li flimkien ma’ ħija Kurt saħħaħna dan il-kumitat magħmul minn tliet min-nies.”
Buhagiar qalilna li minbarra li qed jressqu proġett ambizzjuż fejn qed ifittxu li jkunu aktar minn sempliċi tim ta’ Amateurs imma komunità sportiva fejn qed jressqu erba’ pilastri li huma: Football, Inklużjoni, Impatt Soċjali u eSports. Huwa saħansitra ressaq dokument li fih hemm pjan ambizzjuż ta’ ħames snin u li fih jiġu attwati diversi affarijiet. Fuq kollox dan hu tim tad-dilettanti bl-iskop primarju hu li l-plejers jieħdu pjaċir u jikkompeti f’ambjent san u soċjali.
“Bla dubju li dawn l-erba’ pilastri l-football, l-Inklużjoni, l-Impatt Soċjali u eSports huma fundamentali sabiex tkun attiv fil-komunita’. Il-football hu passjoni naturali ta’ ħafna nies u għalhekk hu wieħed mill-element li jgħaqqad lill-Ħamruniżi flimkien. L-inklużjoni iseħħ meta aħna nkunu attivi fil-komunita’ filwaqt li naraw li dan l-element importanti jiġi eżerċitat mit-tim tagħna. Irrid nħallu impatt soċjali fil-Ħamrun apparti li se nkunu qed nidħlu wkoll fl-eSports, kunċett li f’dawn l-aħħar snin sar ferm popolari maż-żgħażagħ Maltin u Għawdxin.”
Huwa rringrazzja lil dawk kollha li qegħdin joffru s-sapport tagħhom, fosthom il-membri oħrajn tal-kumitat u l-isponsors li mingħajrhom diffiċli jintlaħaq dan il-kunċett.
Buhagiar qalilna li b’sodisfazzjon jgħid li 90 fil-mija tal-plejers li qed jiffurmaw l-iskwadra huma Ħamruniżi u dan ċertament jimlieh b’kuraġġ li verament din il-lokalita’ tiġi rrappreżentata miċ-ċittadini tagħha.
“Kellna madwar 40 players li wieġbu għas-sejħa tagħna u fil-verita’ ma stennejtx li se jkollna daqshekk rispons. Eventwalment niżżilna l-iskwadra bejn 25 u 30 plejer speċjalment rajna li l-plejers ikunu disponibbli għal-logħbiet li jintlagħbu s-Sibt waranofsinhar.
Buhagiar se jkun ukoll il-kowċ tat-tim u f’dawn il-jiem hu qed imexxi sessjonijiet ta’ taħriġ proprju fil-Victor Tedesco Stadium, il-ground ta’ Hamrun Spartans FC. Għalkemm dan it-tim hu entita’ kompletament differenti mit-tim li jieħu sehem fil-kampjonat Premier, il-pjanijiet ta’ Buhagiar hu proprju li jkun hemm kollaborazzjoni mat-tim ewlieni speċjalment bil-plejers żgħażagħ li jrawwmu l-akkademja u li xi kultant mhux dejjem isibu posthom fl-ewwel skwadra.
“Il-pjan tagħna hu li dawk iż-żgħażagħ li ma jsibux posthom ma’ Ħamrun Spartans FC, jiġu jingħaqdu magħna sabiex ikollhom aktar logħob u eventwalment jerġgħu jingħaqdu mal-iskwadra ewlenija. Din għalissa hu biss pjan u wieħed irid jiddiskuti u jara t-triq ‘il quddiem.”
Jurgen Buhagiar flimkien mal-kumitat qed jistenna mhux ftit ix-xahar ta’ Settembru meta hu mistenni jibda l-kampjonat tat-tielet diviżjoni organizzat mill-Malta Amateur Football Association.
Buhagiar li wkoll għandu għarfien sħiħ tad-dinja diġitali, ħoloq is-sit elettroniku, www.fchamrunamateurs.mt fejn hemmhekk hemm iktar informazzjoni dwar l-aħħar partiti ta’ ħbiberija li qed jilagħbu, ritratti u ħafna aktar rkejjen interessanti.
Fuq kollox Hamrun Amateurs FC huma wkoll preżenti fuq il-mezzi soċjali ewlenin fuq Facebook u Instagram fejn anke hemm wieħed jista’ jsib aktar ritratti u informazzjoni siewja dwar dan it-team.