Balzan …….…0
Hibernians ….1
Minn Cristian Muscat
Hibernians għelbu lil Balzan bl-iskor ta’ 1-0 biex filwaqt li laħqu lil Floriana fit-tieni post tal-Malta Premier, huma kkundannaw lil Balzan mal-Bottom Six.
Għall-bidu tal-partita, Hibernians kienu l-aħjar team iżda b’mod gradwali Balzan kibru fl-istatura biex bdew jaqsmu l-logħob mal-avversarji u saħansitra heddew diversi drabi, li iżda, il-Pawlisti kienu l-aktar inċiżivi.
Ta’ nota huwa l-fatt li din il-partita rat konfront bejn iż-żewġt aħwa Caruana – Triston għal Balzan u Lucas għal Hibernians.
Intant, fis-sitt minuta, Hibernians fetħu tajjeb u kienu għoddhom fetħu l-iskor meta Bjorn Kristensen żmarka lil Giannis Bastianos li avvanza iżda meta wasal f’tarf il-kaxxa xeħet għoli.
Ir-reazzjoni ta’ Balzan kienet immedjata iżda x-xutt ta’ Elvis Kamsoba ġie antiċipat fil-ħin … u fit-tmien minuta, il-goalkeeper ta’ Hibernians, Hugo Sacco, ġie mġiegħel idawwar f’corner minn xutt mill-bogħad ta’ Jan Busuttil.
Fit-28 minuta, l-istess Busuttil bidel il-ballun ma’ Kamsoba u meta kien viċin li seta’ jixħet il-ballun fix-xibka, huwa ġie antiċipat fil-ħin minn Higor Gabriel Alves.
Fit-38 minuta, Balzan resqu ferm viċin li jiftħu l-iskor meta Triston Caruana llobja l-free-kick tiegħu fuq Henri Stanic li għeleb in-nasba tal-offside iżda minn taħt il-lasti ra lill-goalkeeper, Hugo Sacco, idawwar f’corner bi qlubija.
It-tieni taqsima bdiet minn corner mogħti minn Bastianos, bi Bjorn Kristensen jipprova jaħsad lil Danilo Golovic b’daqqa ta’ takkuna iżda daqstant ieħor kien tajjeb is-save tal-goalkeeper Balzani.
Fit-53 minuta, Busuttil ġera mal-linja, ġibed lejn tarf il-kaxxa u b’xutt imdawwar ra lil Sacco jixħet f’corner. Minuta wara, Triston Caruana ra x-xutt tiegħu minn barra l-kaxxa jgħaddi jħakkek mal-mimduda.
Fit-68 minuta, Balzan resqu ferm viċin meta Marcel Lima Silva xeħet cross iżda Busuttil kien millimetri ‘l bogħod biex ikompli l-ballun għal ġewwa.
Ta’ dan in-nuqqas huma pattew qares minħabba li, tliet minuti wara, Hibernians fetħu l-iskor meta Silas xeħet lejn FELICE CARVALHO li b’xutt bid-dawra xeħet il-ballun fix-xibka. U fl-74 minuta, iż-żagħżugħ attakkant ta’ Hibernians, Isaiah Chukunyere, ra x-xutt tiegħu jaħbat mal-wieqaf u jispiċċa barra … u tliet minuti mit-tmiem l-istess player ra lil Golovic jilqa’ x-xutt tiegħu minn qagħda ideali.
Balzan: 99-Danilo Golovic, 5-Samir Arab, 7-Triston Caruana, 8-Nicholas Pulis, 10-Jan Busuttil, 14-Oluwatobiloba Awosanya, 17-Henri Braham Stanic, 24-Kevin Williams, 27-Alexander Ayo Akpan, 77-Elvis Kamsoba, 80-Marcel Lima Silva (9-Isaac Westendorf 71) – Coach: Dave Rogers
hibernians: 30-Hugo Sacco, 2-Kleiton de Lima Basilio, 4-Alfred Hamanjoda Silas (14-Dexter Xuereb 84), 5-Kurt Shaw, 6-Lucas Caruana (17-Isaiah Chukunyere 65), 10-Jurgen Degabriele (9-Natha Felicio Carvalho 65) , 11-Bjorn Kristensen, 21-Alex Bruno De Souza Silva (13-Jake Portelli 92), 29-Giannis Bastianos (8-Khevin Rodrigo Fraga 65), 44-Pedro Henrique Nunes, 99-Higor Gabriel Alves – Coach: Branko Nisevic
REFEREE: Ismael Barbara
ASS. REFEREES: Roberto Vella, Paul Apap
RABA’ UFF: Slobodan Petrovic
SKORER: Carvalho 71 (H)
AMMONITI: K. Shaw, L. Caruana (H); E. Kamsoba, N. Pulis (B)
