Tuesday, April 1, 2025

“Ħidma mwettqa b’ħeġġa għax kull persuna jixirqilha d-dinjità umana”

- Patri Marcellino Micallef OFM - Direttur ta’ Soup Kitchen Malta

Aqra wkoll

Il-karità hija wieħed mill-valuri l-aktar nobbli għax wieħed jista’ jagħti lill-oħrajn. Mhux biss li ngħinu lil min hu fil-bżonn, iżda permezz tal-karità, inkunu nistgħu nibnu soċjetà aktar solidali, fejn kull persuna tħoss li tagħmel differenza u li tiġi mħarsa u appoġġjata. Il-vera karità ma tistax tiġi biss mis-suċċess jew mill-flus, iżda mill-imħabba u l-empatija li qed ngħinu lil ħaddieħor mill-qalb.

L-aktar atti żgħar ta’ ġentilezza jistgħu jagħmlu differenza kbira fil-ħajja ta’ ħaddieħor. Inżommu f’moħħna li kulħadd jista’ jkun iħossu iżolat jew fil-bżonn, u li l-aktar bżonn li għandna kultant hu li nħossuna ningħaqdu flimkien bħala komunità.

Żgur li waħda mill-għaqdiet volontarji li qed tagħmel dan hi s-soup Kitchen, immexxija minn Patri Marcellino, u li fetħet il-bibien tagħha fil-25 ta Awwissu tal-2021, u minn dakinhar ma ħarsitx lura. Din hija organizazzjoni li topera biss mid-dħul tad-donazzjonijiet. Is-sena li għaddiew huma servew madwar 29,500 persuna ġejjin minn diversi lokalitajiet madwar Malta.

Dan ix-xogħol jiġi mwettaq b’ħafna ħeġġa għax “kull persuna fid-dinja jixirqilha d-dinjità umana, u s-soċjetà tagħna, għalkemm hija soċjetà influwenti, hija soċjetà li għamlet progress kbir, imma xorta jibqa’ min jaqa’ lura u huma bosta r-raġunijiet għala wieħed jaqta’ lura, l-iktar ħaġa komuni hija l-uġigħ mentali, id-dwejjaq qares”

“Aħna qegħdin ngħixu f’soċjetà li bħal soċjetajiet oħra, għandek 25% li jsofru minn uġigħ mentali, u dan huwa llum meta ngħidu 25% li jsofru minn uġigħ mentali, jiġifieri għada wkoll l-istatika turi li hemm nies li ser isofru minn uġigħ mentali, minn dipressjoni u anke mard ieħor.” Iżda jkompli jispjega li l-uġigħ mentali huwa l-aktar uġigħ, mard li jitfejjaq fid-dinja, għax jekk wieħed jitlob l-għajnuna żgur li se jsib u ma jaqtax lura.

Dawn is-servizzi li huma provduti permezz ta’ 7 membri tal-bord u 85 li huma volontiera, jinkludu l-għoti tal-ikel kemm f’nofsinhar u anke l-ikla ta’ filgħaxija. Kien hemm ukoll xi nies li permezz ta’ din l-għaqda rnexxielhom isibu xogħol.

Huma jqisu li fis-soup kitchen kuljum bħal donnu jiġri bħal miraklu għax huma xhieda ta’ providenza kbira. Mingħajr dan is-sapport ta’ ħafna volontiera u dawk li jagħtu d-donazzjonijiet tagħhom dan kollu ma jkunx possibbli. Minn hawn jirringrazzjahom ta’ din il-ġenerożità hekk kbira li jħallu lil din l-għaqda għaddejja.

Hemm imbagħad raġuni oħra li wieħed jidħol bħal f’kobba u ma tkunx faċli tinqala’. Huwa rrefera għad-droga “li hija rimedju falz. Il-bniedem qed jipprova jimla qalbu, u din hija problema għax ladarba tidħol fiha ma ngħidlekx impossibbli toħroġ minnha imma tkun diffiċli ħafna biex teħles.”  Illum diżgrazzjament id-droga qed tiġi użata kull ħin u kull mument. Isemmi wkoll xi okkażżjonijiet bħalma huma l-funerali, ċelebrazzjonijiet aktar sbieħ bħal tiġiijiet, “għax qisu li l-bniedem ma jafx jifraħ, imma jrid bilfors jaqa’ għad-droga.”

Imbagħad hemm ukoll il-kwistjoni tal-abbuż tax-xorb, l-użura, li huma realtajiet li dak li jkun “tidħol waħdek imma ma toħroġx waħdek” għax żgur li jkollok bżonn l-għajnuna biex tkun tista’ tegħleb dan il-vizzju.

Iżda forsi għal dan hemm iċ-ċavetta ta’ kollox li hija l-edukazzjoni, u fil-fatt qabel magħna Patri Marcellino li l-edukazzjoni twasslek għal affarijiet ta’ suċċess, biss, kif ikompli jgħidilna hu “għandek ukoll nies ta’ edukazzjoni għolja li żvijaw, għax id-droga, eżempju tolqot lill-istrutturi kollha, niltaqa’ ma’ nies li huma penzjonanti, li dawn huma nies li l-penzjoni ma sservihomx iżjed minn erba’ sigħat, ħames sigħat, għax ikunu nefquha minħabba d-droga. Anke dawk li huma b’pagi għoljin, għax id-dinja hija marida bid-droga. U nista’ nkun jien, jista’ jkun sinjur li jiġi bżonn l-għajnuna, għax m’hawn l-ebda fqir fid-dinja li ma jistax jgħin lil ħaddieħor, u m’hawn l-ebda sinjur fid-dinja li m’għandux bżonn jirċievi.” Għalhekk l-edukazzjoni hija kollox għax wieħed ikun mgħarraf fuq l-effetti tad-droga u kif wieħed m’għandux jaqa’ għal dan il-vizzju mill-bidu nett. Għax il-problemi jikbru aktar milli jissolvew.

Iżda xi jżomm wieħed ikompli għaddej jaħdem għall-ġid ta’ ħaddieħor anke jekk tkun lest li tissagrifika l-ħin tiegħek. Żgur li waħda mill-fatturi ewlenin għal dan is-suċċess ta’ ġid ma’ ħaddieħor huwa l-fidi li wieħed ikollu f’Alla. Inħares lejn il-persuna, kull persuna hi unika. Il-fqir mhuwiex tallab, il-fqir mhuwiex kriminal, issib il-forza għax dan l-impenn jimliek b’ferħ intern, ma jfissirx li huwa faċli li l-ħin kollu tilbes il-fardal, iżda mill-banda l-oħra ssib ferħ li ma tixtrihx minn imkien, u għerf li ma ssibu fl-ebda kotba, u issa jiena l-kotba mhux naqrahom imma nikolhom għax lili jimlewni bil-kuraġġ. Jiena nipprova nimita wkoll nies li f’ħajti huma role models għalija, jiena kelli x-xorti diversi drabi niċċelebra l-quddiesa fuq il-qabar ta’ Santa Madre Tereża ta’ Kalkutta, fuq il-qabar tal-Isqof Romero li kienu sparawlu, u matul il-mixja tagħhom kelli ċ-ċans li jkunu role models u li l-eżempju tagħhom jimlieni b’ħafna kuraġġ. Imbagħad xi ħaġa li lili tispirani hi l-kelma ta’ Alla, li tisfidani, tonġorni. Kristu stess qal ‘Agħtuhom intom x’jieklu’. Mhux ħaddieħor ta, intom, mela jien ma nistax naħrab minn din ir-responsabbiltà, u din mhux responsabbiltà ta’ ħaddieħor, hu min hu, jew tal-istat, tal-gvern, tal-Knisja, hija responsabbiltà tiegħi u tiegħek. Fid-dinja hawn ikel biżżejjed għax id-dinja tipproduċi għal 15-il biljun, meta l-popolazzjoni hija inqas minn 8 biljuni. Anke f’Malta l-NSO qalet li aħna naħlu 180 kilo ikel fis-sena. Mela ikel hawn biżżejjed imma l-ħela tiegħi huwa n-nieqes ta’ ħaddieħor.”

L-enerġija tiġih għax dan huwa proġett ta’ Alla, “Alla jridu u għalhekk ir-raġuni għala ħadd ma rnexxielu jkissru. Il-foqra li hawn fid-dinja huma l-mimmi ta’ għajnejn Alla. Nemmen li m’hawn l-ebda poplu fid-dinja li hu ġeneruż daqs il-poplu Malti. Inħossni kburi x’qalb kbira għandu l-poplu Malti. Aħna nagħtuhom l-aħjar, noffru x-xawers, social worker, għandna tliet nurses, jiġifieri nipprovdu dinjità lil ħafna nies. Għafsa ta’ qalb iżda li kien hemm xi nies li qatgħu qalbhom mill-ħajja minkejja li pruvajna ngħinuhom.”

Għaldaqstant kull għajnuna tgħodd biex din tibqa’ topera u tibqa’ tgħin lil kemm jista’ jkun nies. Kull min jixtieq jagħti d-donazzjoni tiegħu jista’ jagħmel dan permezz ta’ dawn il-mezzi:

APS: A/C 41286610023 MT56APSB77013000000041286610023

BOV: A/C 40024827012 MT46VALL22013000000040024827012

PAYPAL: http://www.soupkitchenofmvalletta.com/

Ċekk indirizzat lil The Soup Kitchen OFM – Valletta, 40, St Ursula Street Valletta

Wieħed jista’ wkoll jagħmel kuntatt fuq +356 79227570 jew jidħol fis-sit https://www.facebook.com/soupkitchenofmvalletta

Dan għax kif jikkonkludi Patri Marcellino “tifraħ meta tagħti fid-dinja, għax kemm se takkumula ġid, kemm se tifraħ għax taqla’? Wara ftit kollox isir duħħan u ħobż id-dinja ma jxebbax.” Għalhekk filwaqt li wieħed ikun qed jgħin lil ħaddieħor ikun ukoll qed isib il-milja tiegħu billi jgħin lil ħaddieħor.

Sport