Minn Cristian Muscat
Kif iddeċidejt li ssir fiżjoterapista tal-isport?
Iddeċidejt li nsir fiżjoterapista minħabba li kont nilgħab bħala goalkeeper mal-Gudja FC fl-Ewwel Diviżjoni u kont inweġġa’ u saħansitra dejjem kont immur għand il-physios u għand it-tobba u għalhekk wara fiżjoterapista komplejt biex nilħaq tabib ukoll.
Bħala esperjenza ta’ fiżjoterapista fi klabb tal-Premier biex inżommu fil-qasir tista’ tiddeskriviha bħal qisu għandek familja ġdida u int responsabbli għall-kura tagħha. Ħinijiet ma jeżistux. Il-plejers huma kemm nies li tarahom bħala sħabek u kemm nies li fl-aħħar tal- ġimgħa huma r-responsabbiltá tiegħek li jilagħbu u jkunu fl-aqwa kundizzjoni possibli. Trid tara dejjem kif tilħaq bilanċ bejn il-kuntentizza tal-kowċis, tat-team managers, tal-plejers infushom waqt li tikkonsidra wkoll is-sitwazzjoni tat-tim li tkun qed taħdem għalih.
Bdejt naħdem fil-bidu mal-klabb tal-Mosta fil-Premier. Imbagħd żidt naħdem u ngħin klabbs oħra fosthom Għaxaq FC għax kont nilgħab hemm meta kont żgħir. Zidt li naħdem mal- Msida St Joseph FC mbagħad wara għamilt staġun mal-Gudja fejn għoġobni l-fatt li bdejt ngħolli l-livell tal-kura u nitgħallem minn plejers bħal Rodolfo Soares u Marcelo Dias fejn anke huma kellhom esperjenza ta’ xi tfisser kura professjonali.
Komplejt l-istaġuni ta’ wara ngħin lil Gudja United FC minn ġol-klinika biss u żidt li ngħin lill-klabbs oħra inkluż lil St George’s FC, Qrendi FC, Lija Athletic FC u Dingli Swallows FC fejn bdejna ngħinu fuq il-bżonnijiet neċessarji ta’ kull ġimgħa kif ukoll ġol-klinika.
Żidna wkoll lil San Ġwann FC u lil Xgħajra Tornadoes FC mat-timijiet li nieħdu ħsieb. Ovvjament, meta tkun qed tgħin dan il-volum ta’ plejers, ikolli l-għajnuna ta’ fiżjoterapisti kif ukoll ta’ tobba oħrajn.
Żidna li ngħinu lil Zebbug Rangers FC ukoll. Klabbs bħal Lija, Dingli, Hibernians u Dingli responsabbli għall-kura tan-nurseries tagħhom ukoll. Mexxejna biex nieħdu ħsieb ukoll lil Kalkara FC u Zejtun Corinthians FC. Hija tassew esperjenza sabiħa li tara lil bosta klabbs Maltin jitolbu għal servizz li huwa kruċjali għal-logħba tal-futbol.
Kemm huwa importanti x-xogħol ta’ fiżjoterapsita tal-isport biex jipprevjeni injuries fl-isport?
Rigward ix-xogħol ta’ fiżjoterapista hemm bżonn li nżidu ċerta kuxjenza fuq kif għandu jsir u x’inhu fil- veritá xogħlu. Ghadna fi stat fejn il-mentalitá hija li nieħdu ħsieb injury flok li nipprevenuha. Hemm bżonn li jkun hemm iktar ħidma biex l-istaff tekniku jafda li jsir xogħol siewi min-naha tal-physio u min-naħa tal- physical trainer biex innaqqsu l-livell tal-injuries qabel jaslu biex nieħdu ħsiebhom.
Tara d-differenzi bejn il-klabbs. Hemm minnhom li huma iktar proattivi biex inaqqsu l-injuries u f’dawn it- timijiet tara li r-rata tal-injuries hija ħafna inqas minn meta kkumparata ma’ timijiet oħra.
Kif tqis il-mentalitá tal-isport f pajjiżna fil-preżent, u kif rajtha tinbidel matul is-snin?
Il-mentalitá tal-isport f’Malta avolja qed titjieb xorta għadna verament lura, mhux bilfors min-naħa tal- atleta iżda min-naħa tal-istruttura li qegħdin ġo fiha. Il-professjonaliżmu jibda minn mindu tkun tifel jew tifla żgħira minn x’ħin tqum sakemm torqod. L-atleta ġo dan il-pajjiż sfortunatament iridu jħabbtu wiċċhom ma’ ħafna iktar ostakli matul il-ġurnata li jżommhom lura milli jilħqu l-aqwa potenzjal tagħhom fl-aqwa tal-karriera tagħhom.
Għaddi messaġġ finali lil min jixtieq isir fiżjoterapsita tal-isport.
Għal kull min jixtieq jaħdem bħala fiżjoterapista speċjalment fl-isport inħeġġiġhom biex jidħlu. Hija ħajja vera impenjattiva u ta’ sodisfazzjon enormi meta tara individwu li jkun qiegħed fl-agħar kundizzjoni tiegħu u tarah jerġa’ jasal fl-aqwa tiegħu!
