Wirja kbira fir-raba’ quarter għenet lil Malta jiksbu draw ta’ 2-2 kontra l-Litwanja fit-tielet logħba tal-kampjonat Ewropew tal-Hockey li qed isir fil-Polonja.
Il-Maltin kienu 2-0 minn taħt sa tmiem it-tielet quarter, iżda reazzjoni mill-aqwa tathom l-ewwel punt tagħhom wara żewġ telfiet kontra Ġibilta’ u l-Polonja.
Anke l-Litwani kienu ġejjin minn żewġ telfiet konsekuttivi u kellhom l-għan li kontra l-Maltin jiksbu l-ewwel tliet punti tat-turnament.
L-ewwel tliet quarters kienu ferm pożittiv għall-istess Litwani li marru 2-0 minn fuq grazzi għall-gowls ta’ Rafal Stankevic u Matvidas Pocevicius.
Il-kowċ Malti Chris Attard baqa’ jħeġġeġ lill-plejers tiegħu jagħmlu aktar sforz sabiex jirkupraw il-partita u wara li tentattiv ta’ Thomas Degiovanni ġie salvat mill-gowlkiper avversarju, wasal il-mument pożittiv tal-Maltin li skorjaw żewġ gowls permezz ta’ Tom Degiovanni u Luke Bajada.
It-tisfira finali tal-umpires kienet tfisser ferħ għall-kontinġent Malti li ġab l-ewwel punt tat-turnament.
Malta tilgħab ir-raba’ partita tagħha kontra l-Kroazja għada.
Sadanittant f’aktar partiti li ntlagħbu mill-istess grupp, il-Polonja u Ġibilta’ komplew jimpressjonaw hekk kif rebħu l-logħbiet rispettivi tagħhom.
Il-Pollakki għelbu lil Kroazja 6-1 filwaqt li Ġibilta’ rebħu faċilment lis-Serbja 5-0.
KLASSIFIKA – POOL A
Polonja, Ġibilta’ 9, Kroazja 6, Litwanja Malta 1, Serbja 0
