Fl-aħħar ġimgħat tas-sena, id-Dwana Maltija qabdet 14-il vettura oħra misruqa mill-Kanada u li kienu destinati li jaslu l-Kuwajt.
Fi stqarrija, id-Dwana spjegat li dawn l-14-il vettura nstabu moħbija ġewwa tmien kontejners ta’ 40 pied.
L-uffiċjali tad-dwana fil-Port Ħieles interċettaw, permezz tat-tagħmir tagħhom, disa’ trakkijiet Ford F150; żewġ Lexus RX 35; Lexus 1S30; Dodge Dura; u Jeep Wrangler.
Sal-ġurnata tal-lum, id-Dwana Maltija rnexxielha tinterċetta total ta’ 58 vettura misruqa mill-Kanada li nstabu f’32 kontejner.
Il-Pulizija Maltija u l-Awtoritajiet Kanadiżi ġew infurmati dwar is-sejba u bdiet investigazzjoni b’rabta ma’ dan il-każ.
Il-ħidma tad-Dwana Maltija għenet lill-Pulizija Kanadiża biex fl-aħħar ġimgħat toħroġ akkużi fil-konfront ta’ disa’ persuni suspettati ma’ dan is-serq ta’ vetturi.
