Dik li kellha tkun ċelebrazzjoni nbidlet fi traġedja li ħalliet bosta persuni bla kliem.
L-Awstraljani jinsabu f’luttu wara t-traġedja nazzjonali terribbli li fiha sfortunatament tilfu ħajjithom ħamest itfal.
It-tfal waqgħu għoli ta’ madwar 10 metri wara li bouncy castle tar bir-riħ fl-iskola primarja ta’ Devonport f’Tasmania.
Fl-aħħar sigħat il-Pulizija identifikat lill-vittmi li huma Addison Stewart ta’ 11-il sena, u Zane Mellor, Jye Sheehan, Jalailah Jayne-Maree Jones u Peter Dodt ilkoll ta’ 12-il sena.
F’dan l-inċident weġġgħu tfal oħra tant li għad hemm tliet itfal oħra li jinsabu f’qagħda kritika filwaqt li tifel ieħor ħareġ mill-isptar.
Filwaqt li l-ġenituri tal-vittmi ma xtaqux jitkellmu pubblikament, kien hemm qraba oħra li fakkru fil-memorja tagħhom.
Il-Prim Ministru Awstraljan Scott Morrison iddeskriva l-inċident bħala wieħed ta’ qsim il-qalb u traġedja terribli.
L-investigazzjonijiet b’rabta ma’ dan l-inċident għadhom għaddejjin bil-Pulizija tgħid li se tinvestiga jekk il-bouncy castle kienx marbut mal-art.
“Ilkoll għandna ħafna mistoqsijiet,” qal il-Kummissarju tal-Pulizija ta’ Tasmania Darren Hine.
