Il-Ghana kkonfermat l-ewwel żewġ każijiet tagħha tal-virus fatali Marburg – marda infettiva fl-istess familja tal-virus li jikkawża l-Ebola.
Intqal li ż-żewġ pazjenti mietu riċentament fl-isptar fir-reġjun tan-Nofsinhar ta’ Ashanti. Il-kampjuni tagħhom ġew pożittivi aktar kmieni matul dan ix-xahar u issa ġew ivverifikati minn laboratorju fis-Senegal.
Uffiċjali tas-saħħa fin-nazzjon tal-Afrika tal-Punent qalu li 98 persuna issa jinsabu taħt kwarantina bħala każijiet ta’ kuntatti suspettati.
Sa issa għadu ma jeżisti l-ebda trattament għall-virus Marburg – iżda t-tobba qalu li jekk wieħed jixrob ħafna ilma u jkunu trattati ċertu sintomi speċifiċi jiżdiedu ċ-ċansijiet li l-pazjent isalva.
Dan il-virus jiġi trażmess minn friefet il-lejl tal-frott u jinfirex bejn il-bnedmin permezz ta’ trażmissjni ta’ fluwidi tal-ġisem. Hi marda severa, ħafna drabi fatali b’sintomi li jinkludu uġigħ ta’ ras, deni u uġigħ fil-muskoli fost oħrajn.
L-uffiċjali fil-pajjiż qed iwissu lin-nies biex iżommu ‘l bogħod mill-għerien u biex isajru sewwa l-prodotti tal-laħam qabel jikkunsmawhom.
L-Għaqda Dinjija tas-Saħħa (WHO) tgħid li l-Afrika, tifqigħat preċedenti u każijiet sporadiċi ġew irrappurtati fl-Angola, ir-Repubblika Demokratika tal-Kongo, il-Kenja, l-Afrika ta’ Isfel u l-Uganda.
L-ewwel tifqigħa tal-virus kienet fil-Ġermanja fl-1967 fejn mietu seba’ persuni.
