Il-president tal-Konfederazzjoni tal-Football Afrikan (CAF), Patrice Motsepe, jgħid li d-diskussjonijiet dwar l-ospitar tat-Tazza tad-Dinja kull sentejn għandhom ikomplu “b’moħħ miftuħ”, u jipprovdu spinta potenzjali għall-pjani kontroversjali tal-FIFA.
Motsepe huwa meqjus bħala alleat qawwi tal-President tal-FIFA, Gianni Infantino, u l-CAF tipprovdi parti ta’ votazzjoni mdaqqsa fi ħdan l-organizzazzjoni, b’54 mill-211 membru tagħha.
“Il-CAF hija tal-fehma li f’dan l-istadju, dak li hu l-iktar importanti huwa li d-diskussjonijiet u d-deliberazzjonijiet ikomplu jsiru b’mod miftuħ u bl-objettiv li jsir dak li huwa fl-aħjar interess tal-Assoċjazzjonijiet Membri kollha, il-Konfederazzjonijiet, players tal-football u partijiet interessati oħra madwar id-dinja,”qal Motsepe fi stqarrija nhar it-Tlieta.
“Il-CAF hija impenjata ħafna għall-iżvilupp, it-tkabbir u s-suċċess tal-football fl-Afrika u l-bqija tad-dinja. Aħna nemmnu li t-tkabbir u s-suċċess fit-tul tal-FIFA, l-Assoċjazzjonijiet Membri u l-Konfederazzjonijiet kollha huma marbutin b’mod inseparabbi.”
Il-Konfederazzjoni tal-Football Asjatiku (AFC) laqgħet l-istudju tal-fattibbiltà tal- FIFA għall-pjani, filwaqt li l-Konfederazzjoni tal-Football tal-Assoċjazzjoni tat-Tramuntana, l-Amerika Ċentrali u l-Karibew (CONCACAF) qalet li kienet potenzjalment miftuħa għall-idea, sakemm toħloq struttura aktar bilanċjata għal-logħba globalment.
Il-ġimgħa l-oħra l-Konfederazzjoni tal-Football tal-Amerika t’Isfel (CONMEBOL) ikkritikat il-proposta, meta qalet li hija “invijabbli ħafna” u se tegħleb il-kalendarju tal-football.
Il-korp governattiv tal-Football Ewropew, il-UEFA, ukoll irrifjutat l-idea, bil-president tagħha, Alexander Ceferin, iwissi li l-membri tagħha jistgħu jibbojkottjaw it-Tazza tad-Dinja jekk il-pjani tal-FIFA jimxu ‘l quddiem u jagħmlu l-avveniment kull sentejn.
