Il-President ta’ Malta George Vella u s-Sinjura Vella żaru lill-ħaddiema tal-Palazz ta’ Sant’Anton waqt il-qtugħ tal-frott taċ-ċitru mill-masġar taċ-ċitru tal-Palazz, bi tħejjija għall-Festa taċ-Ċitru 2021. Din is-sena, dan l-avveniment annwali se jsir f’format differenti minn tas-soltu sabiex ikun konformi mal-linji gwida maħruġin mill-awtoritajiet tas-saħħa kaġun tal-imxija tal-COVID-19. Minflok minn fiera, il-prodotti se jinbiegħu minn The President’s Kitchen Garden, Ħ’Attard, minn nhar is-Sibt, it-2 ta’ Jannar 2021 sa ma jispiċċaw il-ħażniet.
Għall-bejgħ se jkun hemm larinġ, lumi, mandolin u grapefruit maqtugħin friski, kif ukoll diversi ħlewwiet taċ-ċitru. Id-dħul kollu minn din l-inizjattiva annwali se jmur b’risq The Malta Community Chest Fund Foundation.
Is-Sa Miriam Vella, mart il-President, qalet li kienet tkun ħasra kieku l-abbundanza ta’ frott taċ-ċitru li hemm fil-masġar tal-Palazz ta’ Sant’Anton tħalliet tinħela minħabba l-pandemija. Għaldaqstant, instabet sistema alternattiva kif il-pubbliku xorta waħda jkun jista’ jgawdi l-benna taċ-ċitru Malti, filwaqt li fl-istess ħin jgħin lil min hu fil-bżonn.
Waqt iż-żjara, il-President u s-Sa Vella kienu akkumpanjati, fost l-oħrajn, miċ-Chairperson tal-Bord Amministrattiv ta’ The Malta Community Chest Fund Marlene Mizzi.
