Nhar l-Erbgħa t-8 ta’ Ġunju 2022 fis-6.00 pm, il-Futsal Malta Association sejħet il-Laqgħa Ġenerali Annwali fis-Sala taċ-Ċentinarju, f’Ta’ Qali. Il-laqgħa ġabet fit-tmiem l-impenji amministrattivi tal-FMA għall-istaġun tal-Futsal 2021-22, filwaqt li fetħet formalment l-istaġun 2022-23 li għandha tkun sena oħra ta’ tkabbir u konsolidazzjoni għad-dixxiplina lokali.
L-FMA ikkonfermat l-istruttura tal-kumitat eżekuttiv għall-aħħar sena tat-terminu statutorju, bil-Perit Mark Borg ikkonfermat bħala President, is-Sur Claudio Azzopardi bħala Viċi-President, Av. Stefan Cutajar bħala Segretarju Ġenerali, is-Sur Matthew Borg bħala Teżorier, u s-Sinjuri Joseph Meilak, Mark Gauci, John Schembri, Jeremy Dalli u Clive Perry bħala membri.
Fost materji oħra fuq l-aġenda tal-Laqgħa Ġenerali Annwali, l-FMA iddeskriviet il-viżjoni tagħha għall-istaġun 2022-23 u kkonfermat ir-ritorn tal-kompetizzjoni tas-Super Cup u spjegat li din it-tazza se tiġi milgħuba lejn nofs Settembru tal-2022. L-FMA irribadiet ukoll li l-isħubija kummerċjali mal-isponsors ewlenin Enemed Co. Ltd u E&L Enterprises se tkompli għal sena oħra, bid-drittijiet fuq l-isem tal-kompetizzjoni tal-Kampjonat u tat-Trofew tan-Knock-Out assigurati minn dawn l-isponsors rispettivament.
