Dan is-sajf, grupp ta’ Guides, Rangers, Senior Rangers u Leaders mis-7th Rabat Girl Guides ivvjaġġaw lejn Windsor, fir-Renju Unit, biex jipparteċipaw f’WINGS 2026, jamboree internazzjonali tal-iScouts u l-Girl Guides li joffri avventura, sfidi u skambju kulturali.
L-avveniment, li sar f’Windsor Great Park, bidel iż-żona tal-kampeġġ fir-“Renju ta’ WINGS”, fejn il-parteċipanti għamlu vjaġġ permezz ta’ sensiela ta’ gruppi (Guilds) b’temi differenti u ħadu sehem f’programm varjat ta’ attivitajiet.
Il-kontinġent Malti ħa sehem f’avventuri marbuta mal-ilma fil-Voyager’s Guild, żviluppa ħiliet fil-beraħ fis-Survivalist’s Guild u esplora l-kreattività tiegħu fl-Artisan’s Guild. Il-parteċipanti affrontaw ukoll attivitajiet ta’ tixbit fl-Scaler and Miner’s Guild u poġġew fil-prova l-kapaċitajiet tagħhom fil-ħidma f’tim u fis-soluzzjoni tal-problemi fiċ-Challenger’s Guild.
Attivitajiet oħra ffukaw fuq il-wirjiet, attivitajiet bir-roti u l-intraprenditorija, u b’hekk offrew lill-parteċipanti bosta opportunitajiet biex jiksbu ħiliet ġodda u jisfidaw lilhom infushom.
Minbarra l-programm ta’ Guild, il-grupp żar Windsor u gawda divertiment ta’ filgħaxija, serati b’temi differenti, kif ukoll iċ-ċerimonji tal-ftuħ u tal-għeluq tal-jamboree. Il-programm impenjattiv żgura li l-esperjenza internazzjonali kompliet anke wara li ntemmu l-attivitajiet ta’ matul il-jum.
Il-Girl Guides tar-Rabat taw ukoll sehemhom fl-aspett kulturali ta’ WINGS billi organizzaw attività li tirrappreżenta lil Malta. Ispirati mit-tema medjevali tal-jamboree, il-parteċipanti ġew mistiedna jiddisinjaw tarka Maltija filwaqt li jitgħallmu dwar is-simboli, l-istorja u l-kultura tal-pajjiż.
Wara ġimgħa sħiħa ta’ kampeġġ, il-grupp kompla l-vjaġġ tiegħu bi żjara f’Londra, fejn il-membri esploraw diversi attrazzjonijiet magħrufa tal-belt kapitali. L-itinerarju tagħhom inkluda Pax Lodge, wieħed mill-ħames Ċentri Dinjin immexxija mill-Assoċjazzjoni Dinjija tal-Girl Guides u l-Girl Scouts.
Matul din l-esperjenza, il-Guides u r-Rangers iltaqgħu ma’ Scouts u Guides minn pajjiżi differenti, partu badges u mkatar, żaru postijiet ġodda u tgħallmu jinnavigaw flimkien f’sitwazzjonijiet mhux familjari ghalihom.
WINGS 2026 offra lill-grupp opportunitajiet siewja biex il-membri jiżviluppaw l-indipendenza tagħhom, isaħħu l-ħbiberiji u joħolqu tifkiriet li jibqgħu magħhom għal dejjem, u b’hekk ġiet fi tmiemha avventura internazzjonali memorabbli tal-Guiding.
