Aktar kmieni matul din il-ġimgħa, il-president tal-Malta Football Association flimkien ma’ numru żgħir ta’ presidenti minn pajjiżi b’rabta mill-qrib mal-Federazzjoni Taljana tal-Futbol (FIGC), ġew mistiedna jattendu għall-Assemblea Ġenerali tal-FIGC f’Ruma. Din il-laqgħa elettiva rat lil Gabriele Gravina jirbaħ it-tielet mandat tiegħu bħala President tal-FIGC.
Fost id-delegazzjoni ta’ uffiċjali li attendew, apparti minn Malta permezz tal-president Bjorn Vassallo, kien hemm ukoll il-president tal-Assoċjazzjoni tal-Futbol Ukren Andriy Shevchenko, il-president tal-Assoċjazzjoni tal-Futbol tal-Montenegro Dejan Savićević, il-president tal-Federazzjoni tal-Futbol ta’ San Marino Marco Tura, u l-president tal-Federazzjoni tal-Futbol Albaniża Armand Duka. Attendew ukoll il-president tal-FIFA Gianni Infantino u l-president tal-UEFA Aleksander Čeferin.
