Għada se ssir l-ewwel edizzjoni tal-Malta Film Awards. In-nuqqas li jingħataw dawn l-unuri kien ilu jinħass. Il-Malta Film Awards qed isiru fuq inizjattiva tal-Kummissjoni Maltija għall-Films. Wieħed irid jirrikonoxxi li l-moħħ u l-enerġija wara dan kollu hu l-Kummissarju Johann Grech.
L-industrija tal-produzzjonijiet lokali llum kibret għax primarjament għandek tliet stazzjonijiet kbar tat-televiżjoni li jridu is-sensiliet. Kibret il-kwantità; ma kibritx bl-istess mod il-kwalità.
Qed naraw aktar films fit-teatri lokali u issa anke fuq platforms diġitali. Il-Gvern qed jinvesti aktar f’dan il-qasam u l-għajnuna lil min jixtieq jipproduċi film kibret permezz ta’ divrsi fondi. Interessanti wieħed jinnota li qed jiżdiedu l-inizjattivi privati. Għandna wkoll min qed jipponta jimmira għall-unuri kbar bħall-Oscars. Ironikalment, għall-Oscars nittantaw xortina minkejja li għadna ’l bogħod biex nilħqu dak il-livell, imma imbagħad bqajna pass lura għal Malta Film Awards.
Hemm bżonn nappoġġjaw din l-inizjattiva tal-Malta Film Awards u kien żball min seta’ fittex li ma jkunx parti minn din iċ-ċelebrazzjoni. Fil-ħajja, kollox jista’ jsir aħjar. L-affarijiet jitjiebu wara diskussjoni miftuħa u sinċiera filwaqt li l-aġenda personali ma titħallix tagħmina.
Il-Malta Film Awards għandhom ikomplu jsiru fis-snin li ġejjin. Wieħed għandu jirrifletti għandhomx ikunu annwali jew kull sentejn jew tlieta. Nissuġerixxi li għall-Awards ma jsirux billi l-producer japplika imma għandu jkun hemm Bord tekniku li jinnomina l-films u s-sensiliet televiżivi minn fost dawk kollha disponibbli. Għandha ssir riflessjoni jekk min jaħdem fil-qasam tat-televiżjoni (atturi, kru, eċċ.) għandux jikkompeti ma’ dawk fil-qasam tal-films. Ma naħsibx li għandna niffissaw u ninnominaw bilfors ħamsa f’kull kategorija.
L-awguri tiegħi u ta ħafna hu li l-Malta Film Awards ikunu suċċess kbir u kull min hu nnominat iħossu kburi li kiseb dan l-għarfien. Sadanittant, matul din il-ġimgħa għaddejjin ħafna inizjattivi u diskussjonijiet dwar il-futur tal-industrija lokali tal-films u t-televiżjoni. Kull min hu nteressat għandu jieħu sehem b’mod attiv għall-ġid ta’ din l-industrija li qegħda tikber.
Dawn huma n-nominazzjonijiet fil-kategoriji ewlenin tal-films:
Għall-Aħjar Film: The Boat; Ħabbilni Ħa Nirbaħ; Blood on the Crown; Id-Destin; Hemm Dar il-Qala.
Għall-Aħjar Direttur: Winston Azzopardi (The Boat); Jonathan Farrugia (Pass Pass Għal Auschwitz); Davide Ferrario (Blood on the Crown); Justin Farrugia u Steven Dalli (Strada Stretta); Steven Dalli u Justin Farrugia (L-Għarusa).
Għall-Aħjar Attur: Mark Doneo (Hemm Dar il-Qala); Malcolm McDowell (Blood on the Crown); Godwin Scerri (Blood on the Crown); Mario Micallef (L-Ispettur); Harvey Keitel (Blood on the Crown).
Għall-Aħjar Attur f’Parti Sekondarja: Sinclair Mifsud (L-Għarusa); Leeshon Alexander (Blood on the Crown); Carlos Farrugia (Ħabbilni Ħa Nirbaħ); Narcy Calamatta (Ħabbilni ħa Nirbaħ); Ian Virgo (Blood on the Crown).
Għall-Aħjar Attriċi: Paula Mintoff (L-Għarusa); Mary Rose Mallia (Il-Mandraġġara); Clare Agius (Il-Madonna taċ-Ċoqqa); Mary Rose Mallia (Il-Madonna tac-Ċoqqa); Louise Doneo (Hemm Dar il-Qala).
Għall-Aħjar Attriċi f’Parti Sekondarja: Sarah Camilleri (L-Ispettur); Mary Rose Mallia (Qerq); Antonella Axisa (L-Għarusa); Nicola Mangion (Blood on the Crown); Jane Marshall (Ipokriti).
Għall-Aħjar Film mill-Passat: Operation White Dove; Qerq; Scrooge; Anġli – The Movie; Mera tal-Passat.
