“Il-multi jkunu effettivi dment li jiġu infurzati”

“Bħalissa għaddej il-proċess leġiżlattiv b’rabta mat-tibdil fil-multi għall-kontravenzjonijiet tat-traffiku. Issa li qbilna fuqhom anke fuq livell ta’ Gvern, hemm dan il-proċess li jidħol fis-seħħ ladarba jkun konkluż. Qed naraw li dan it-tibdil iseħħ fil-ġimgħat li ġejjin.”

Qal dan il-Ministru għat-Trasport, l-Infrastruttura u l-Proġetti Kapitali Aaron Farrugia meta mistoqsi minn talk.mt dwar it-tibdil fil-multi u l-punti li jitnaqqsu għall-kontravenzjonijiet tat-traffiku.

Il-Ministru Farrugia qal li l-pubbliku fil-maġġoranza tiegħu jrid id-dixxiplina u s-serjetà f’pajjiżna. L-għan ewlieni mhuwiex li l-nies jeħlu l-multi jew li jinħolqu iktar kontravenzjonijiet iżda l-għan huwa wieħed, illi fit-toroq Maltin ikun hemm aktar sigurtà.

Fejn jidħlu l-kontravenzjonijiet, il-Ministru Farrugia qal li l-iktar li saħqu fuqhom huma dawk li għandhom x’jaqsmu mas-sigurtà tat-toroq, bħall-użu ta’ mobile, sewqan eċċessiv u min jgħaddi minn fuq dawl aħmar fost oħrajn. Rigward dan, il-Ministru semma wkoll li kien il-poplu stess li talab sabiex tittieħed azzjoni u tingħata aktar sigurtà fit-toroq Maltin.

Mistoqsi kemm jaħseb li se jkunu effettivi dawn il-multi ġodda, il-Ministru Farrugia qal: “ikunu effettivi dment li jiġu infurzati. Meta nedejna l-pjan komprensiv tagħna biex ikollna aktar sigurtà fit-toroq, l-infurzar huwa kruċjali. Inutli jkollna l-ogħla multi, illi suppost inaffru n-nies, imbagħad ma jidħlux fis-seħħ għax ma jkunx hemm l-infurzar.”

“Proprju l-infuzar qed nagħmluh b’diversi inizjattivi fosthom b’investiment ta’ €120,000 fejn inxtraw erba’ muturi ġodda għall-uffiċjali tal-infurzar biex jintużaw waqt l-ispezzjonijiet imwettqa fit-toroq Maltin. Dan ifisser li biż-żieda tal-4 muturi, issa b’kollox l-uffiċjali tal-infurzar għandhom total ta’ 14-il mutur għall-użu tagħhom.”

Kmieni dan ix-xahar ġie mħabbar li se jidħlu fis-seħħ multi ġodda għal min jikser ir-regoli tas-sewqan. Dan hekk kif xufiera ta’ vetturi żgħar u muturi li se jinqabdu jużaw il-mobile jew earphones waqt is-sewqan se jibdew jeħlu multa ta’ €200.

Għal dawk li jsuqu vetturi ikbar bħal trakkijiet u kowċis u xufiera ta’ taxis, l-multa se titla’ għal €300. Minbarra l-multi, se jkun hemm ukoll żieda fil-punti fejn min jinqabad bil-mobile waqt is-sewqan, jistgħu jitnaqqsu bejn sitta u disa’ punti.

Minbarra multi fuq l-użu tal-mobile, se jkun hemm ukoll multi għal min jibqa’ għaddej isuq meta d-dawl tas-sinjali tat-traffiku jkunu fuq l-aħmar. F’dak il-każ il-multa ser titla’ għal €200. Dan filwaqt li min jinqabad isuq b’veloċità eċċessiva ta’ iktar minn 15-il kilomteru ’l fuq mil-limitu, il-multa se tiżdied għal €100. Dawk li jkollhom togħbija bħal vireg u xbieki tal-ħadid li mhumiex imwaħħlin sew, il-multa tkun dik ta’ €200. Min jinqabad iġorr iktar passiġġieri minn kemm permissibbli se jeħel €50 għal kull persuna żejda li jkun qed jgħabbi fil-vettura.