Kif għażilt l-atletika fost minjiera ta’ sports ieħor?
Sa min mindu kont ta’ età vera żgħira dejjem niftakarni niġri u nilgħab fid-dar jew fit-triq mal-kuġini.
Niftakarni nara kompetizzjonijiet fuq it-televiżjoni imbagħad nagħmel bħalhom: ezempju ġol-garage kont nagħmel kaxxa fin-nofs daqslikieku xi hurdle jew nipprova nagħmel long jump billi nuża karkura minnhom fil-bidu u oħra biex nimmarka fejn inkun qbiżt.
Nistqar ngħid li qatt ma kont nobsor li għad xi darba verament nikkompeti fi trakka ta’ vera. Ikkompetejt kważi fid-distanzi kollha.
Bdejt b’distanzi qosra u eventwalment ħadt sehem anke f’żewġ maratoni, dawk ta’ Ateni u ta’ New York.
Ħadt sehem fis-60m, 100m, 200m, 800m, 1.5km, 3km, 5km, 10km, 13-il km, 17-il km, in-nofs maratona (21.1km) u kif diġà semmejt, il-maratona (42.2km). Kelli l-opportunitá wkoll li nieħu seħem fil-long jump.
Kemm kellek żmien meta bdejt tipprattikka l-atletika?
Bdejt nipprattika l-atletika fl-etá ta’ 18-il sena.
X’ħeġġek l-iktar biex tibda tipprattika dan l-isport?
Kien hemm reklam li rajt b’kumbinazzjoni. Dan grazzi għall-inizjattiva ta’ Mario Bonello u Paul Camilleri, żewġ coaches professjonali li flimkien mal-Kunsill Lokali tan-Nadur ħolqu l-Gozo Athletix AC. Għalina l-Għawdxin, din kienet l-ewwel opportunità fejn stajna nipprattikaw il-ġiri, it-tfigħ u l-qbiż.
Qabel kont nipprattika l-basketball u fl-ewwel erba’ snin tal-atletika kont anke nilgħab il-football. Imbagħad qlibt għall-atletika fejn ħassejt li huwa l-aktar sports li jagħtini sodisfazzjon.
Il-fatt li int ġejja minn Għawdex, x’sagrifiċċji iktar ikollok tagħmel?
Bħal sħabi l-atleti Għawdxin, għandi sfidi partikolari x’negħleb. Personalment ħassejtha l-iktar meta kont nikkompeti fid- distanzi l-qosra.
Dan minħabba l-fatt li ma kellniex trakka adatta biex nittrenjaw fiha. Konna nittrenjaw fil-ground tal- football u allura kont inħossni żvantaġġata ħdejn l-atleti Maltin li għandhom faċilitajiet aħjar fejn jipprattikaw.
Ilum il-ġurnata għandna trakka ta’ madwar 200m, li għalkemm qed tkun ta’ għajnuna għalina u għall- atleti futuri Għawdxin, xorta jinħass il-bżonn li tinbena trakka ta’ 400m b’faċilitajiet adekwati u fejn inkunu nistgħu nipprattikaw ukoll sports bħax-shot put, javelin u l-long jump.
Rigward il-ġurnata tal- kompetizzjoni, tirrekjedi aktar sagrifiċċju biex inkunu bizzejjed fil-ħin biex nilħqu nikkompetu.
Eżempju, għal ġirja li tibda fi 7.00 am, rridu naqbdu vapur sagħtejn qabel.
Min kienet dik il-persuna li ispiratek biex tagħżel l-atletika?
Kif semmejt minn dejjem kont attiva, u kien riklam b’kumbinazzjoni tal-Gozo Athletix AC, imbagħad eventwalment Mario Bonello ħalla impatt fuqi biex nibda nieħu l-atletika bis-serjetá.
Liema unuri prinċipali irnexxielek tikseb fil-karriera tiegħek?
Irbaħt diversi unuri fl-atletika. L-ewwel wieħed kien fl-2008 meta ġejt fit-tieni post fil-200m fiċ- Championships.
Fl-2012 ġejt fit-tielet post fil-200m fl-MAAA Challenge u fl-2015 ġejt l-ewwel fit-800m fl-istess kompetizzjoni.
Unuri oħra li rbaħt marbuta mad-distanzi twal kienu meta spiċċajt fl-ewwel, fit-tieni u fit-tielet post. Ingħatajt ukoll premijiet fost l-atleti nisa Għawdxin u kategorija tal-etá.
Fost dawn l-unuri fl-istaġun tas-sena 2015-16, irbaħt l-ewwel post fil-kategorija tal-25 sena fl-MAAA Road Running League u fl-2019 San Lawrenz 5km run in aid of Guatemala, it-tieni post fl-10km ta’ Ħal Qormi, OASI Cup Run, u House of Sport Three Cites u t-tielet post fil-Gozo Half Marathon, House of Sport 10k night run u 20km, ġewwa Spoleto fl-Italja.
Kelli l-unur li fis-snin 2015, 2017 u 2019 ikkwalifikajt bħala finalista għall- Isportiva Għawdxija tas- Sena.
Kemm temmen li l-media tagħtikom bizzejed pubbliċità u exposure jew dan isir waqt kompetizzjonijiet importanti bħal ma huma l-Logħob tal-Pajjiżi ż- Żgħar?
Ilum il-ġurnata nemmen li tingħata aktar promozzjoni minn qabel anke b’diversi programmi, artikli u posts fuq media socjali.
Nistqar peró li l-attenzjoni għadha xorta ffokata aktar fuq il-football.
Għandek xi ħolma li tixtieq tikseb fl-atletika?
Nixtieq li nibqa’ motivata biex nibqa’ nikkompeti u nikseb riżultati tajbin.
Peró iktar minn hekk, permezz tal-atletika, nixtieq li sakemm inkun b’saħħti biżżejjed nuża l-enerġija tiegħi għal persuni li qed ibatu.
X’sagrifiċċji u impenn jitlob l-isport li int tipprattikka?
Bħal kull ħaga oħra fil-ħajja l-atletika titlob impenn u sagrifiċċji li jkolli nagħmel mhux biss jiena imma anke n-nies ta’ madwari, fosthom il-ħin twil ta’ taħrig, il-ħinijiet ta’ taħrig u t-tip ta’ ikel li niekol.
Ninsab grata ħafna għall-coaches tiegħi, Mario Bonello, Paul Camilleri u Fabio Spiteri, il-club tal- Athletix Gozo AC, sħabi, fiżjo, kollegi u l-familjari li dejjem emmnu fija u tawni ċans nipprattika u nikkompeti b’mod regolari.
Għalkemm l-atleti li tikkompeti magħhom huma wkoll ħbieb tiegħek, ninsab persważ li jidħol ukoll ċertu sens ta’ kompetizzjoni fejn wieħed ikun irid jikseb ħin aħjar mill-ieħor. X’tikkummenta?
Iva! F’tellieqa kulħadd jipprova jikseb l–aħjar ħinijiet u allura jidħol element ta’ kompetizzjoni.
U propju din hija waħda mill-biżgħat tiegħi personali ma’ sħabi l-kompetituri. Dan minħabba l-fatt li jekk ma tibqax fuq bazi ta’ kompetizzjoni, bħal meta tidħol l-għira, dan jaf taffettwa ir-relazzjoni ta’ bejnietna.
X’kompetizzjonijiet prinċipali se tieħu sehem fihom fil-futur qrib?
Minħabba s-sitwazzjoni li qed ngħixu fiha, bħalissa m’għandi l-ebda kompetizzjoni speċifika. Kull ġirja għandha l-istorja tagħha. Meta jirnexxielek tibda u tispiċċa ġirja, is-sodisfazzjoni huwa kbir. Bla ebda dubju aktar minn qatt qabel napprezza kull ġirja.
Nixtieqek tgħaddi messaġġ lil dawk it-tfal u żgħażagħ li qegħdin jaħsbuha bis-serjetà li jibdew jipprattikaw l-atletika.
Inħeġġiġhom jeħduha bis-serjetá għaliex l-atletika tagħtik ħafna sodisfazzjon.
Għalkemm huwa sport li tista’ tipprattikah ma’ persuni oħra, huwa sport individwali.
U dan ifisser sagrifiċċji, u għalhekk ir-riżultati li tikseb ikunu sodifsazzjon ferm akbar. L-atletika tgħinek ħafna biex tħossok aħjar mentalment, fiżikament u soċjalment.
