Fit-80 anniversarju mill-għarqa ta’ HMS Urge, il-President ta’ Malta George Vella, flimkien mal-Kummissarju Għoli tar-Renju Unit Katherine Ward, kixef monument li jfakkar il-mewt tal-ekwipaġġ abbord.
Waqt avveniment ta’ tifkira fil-Forti Sant’Iermu, il-President Vella qal li s-suldati li tilfu ħajjithom fl-HMS Urge għamlu sagrifiċċji enormi biex iżommu mal-ġurament ta’ lealtà għar-responsabbiltajiet militari u navali li daħlu għalihom meta daħlu fis-servizz.
Il-President qal li, “Bħala l-pajjiż li dawn iż-żgħażagħ kuraġġużi taw ħajjithom biex jiddefenduh, huwa ferm xieraq li jitwaqqaf dan il-monument biex il-ġrajja tagħhom ma tintesiex.” Il-President Vella qal ukoll li issa nafu fejn jinsab is-sottomarin li għereq fis-27 ta’ April 1942 u li nafu wkoll l-ismijiet taż-żgħażagħ kuraġġużi li tilfu ħajjithom fil-baħar.
Il-President Vella sellem il-memorja tal-ekwipaġġ tal-HMS Urge u, permezz tagħhom, il-memorja wkoll ta’ ħafna oħrajn li għadna ma nafux bihom, li jinsabu xi mkien f’qiegħ il-baħar, fejn taw ħajjithom biex aħna nkunu nistgħu ngħixu.
Il-Kummissarju Għoli tar-Renju Unit Katherine Ward qalet li din il-kommemorazzjoni tenfasizza r-rabtiet qawwija u dejjiema bejn ir-Renju Unit u Malta, u filwaqt li esprimiet it-tama tagħha li l-monument jibqa’ jagħti xhieda dejjiema tal-ekwipaġġ, qalet li s-sagrifiċċji ta’ dawn is-suldati, flimkien ma’ oħrajn, ma għandhomx ifakkruna biss fit-traġedja tal-gwerra, iżda wkoll fil-valur tal-libertà, u r-rebħa tal-paċi.
Il-Ministru għall-Wirt Nazzjonali, l-Arti u l-Gvern Lokali Owen Bonnici qal li l-kommemorazzjoni tat-80 anniversarju ta’ din it-traġedja hija tislima xierqa tal-memorja ta’ dawk li tilfu ħajjithom. “Ejjew ma ninsewx il-passat tagħna, u b’dan, ejjew nonoraw l-isforzi ta’ dawn iż-żgħażagħ li taw ħajjithom għal pajjiżna fit-Tieni Gwerra Dinjija”, qal il-ministru.
Anthony Scicluna, iċ-Chairman ta’ Heritage Malta, qal li l-monument se jkun xhieda tas-sagrifiċċju u l-qlubija tal-ekwipaġġ tal-HMS Urge. Irrimarka li ċ-ċerimonja tal-kxif ippreżentat opportunità unika biex turi s-sbuħija storika ta’ Malta u l-ospitalità magħrufa sew tagħha. Huwa esprima t-tama li tali eżiti pożittivi jibqgħu jegħlbu dejjem id-deżolazzjoni tal-gwerra.
Il-fdalijiet tas-sottomarin HMS Urge tal-Qawwa Navali Rjali u l-post fejn intilef l-ekwipaġġ tiegħu ġew skoperti matul servej b’telerilevament li sar lil hinn mix-xatt tal-Belt Valletta fl-2019. Tim ta’ bugħaddasa ta’ Heritage Malta u l-Università ta’ Malta, immexxi b’ħila kbira mill-Professur Timothy Gambin, niżel f’qiegħ il-baħar sentejn wara u identifika b’mod konklużiv li l-fdalijiet kienu fil-fatt tal-HMS Urge.
