Il-prosekuturi Arġentini qed jinvestigaw lit-tabib ta’ Diego Maradona għal dak li jista’ jkun każ ta’ qtil b’negliġenza.
Il-Pulizija fi Buenos Arires għamlu tfittxijiet fid-dar u fil-klinika privata ta’ Leopoldo Luque hekk kif bdiet investigazzjoni biex jiġi magħruf kienx hemm xi forma ta’ negliġenza min-naħa tiegħu.
Fir-rejds li saru bil-ħsieb li jkun hemm stampa aktar ċara tal-aħħar jiem ta’ Maradona f’daru ġew elevati kompjuters, mowbajls u karti relatati ma’ trattament mediku.
L-awtoritajiet qed jissusspettaw li seta’ kien hemm negliġenza fil-mod kif ġie trattat il-plejer wara operazzjoni delikata f’moħħu u li t-trattament li ngħata ma kienx jilħaq l-aspettativi.
Il-plejer leġġendarju miet kawża ta’ attakk tal-qalb fir-residenza tiegħu fejn kien qiegħed jirkupra minn operazzjoni riċenti.
It-tabib min-naħa tiegħu ċaħad li seta’ għamel xi ħaġa ħażina fit-trattamenti tiegħu.
