Kif ġietek il-ħajra li tidħol fil-Pulizija?
Il-ħajra li nidhol Pulizija ġiet mill-fatt li kelli n-nannu Ġużeppi li kien suldat mar-Royal Malta Artillery u dejjem xtaqt li nkun fis-servizz peró għażilt li nkun Pulizija imbagħad wara daħal ħija fl-armata.
X’inhuma r-responsabbiltajiet tiegħek f’dan ir-rwol?
Jien bdejt kuntistabbli fid-distrett ta’ Ħaz-Żebbuġ meta dħalt fil-Pulizija nhar il-11 ta’ Lulju 2002.
B’kollox s’issa għamilt 22 sena u nofs fid-distrett imsemmi u li miegħu għandu s-Siġġiewi u Ħal=Qormi fejn ġieli kont inkun duty u issa ilni sena Assistent Personali mas-Supretendent, Galea Scannura.
X’tikkumenta fuq l-unur riċenti ferm prestiġjuż li rbaħt u dan x’fisser għalik personali?
Jien apprezzajt immens li persuna Maltija imma li emigrat lejn l-Awstralja tul ta’ żmien ilu rat l-inċident iseħħ u kitbet lill-Kummissarju direttament. Huwa ta’ sodisfazzjon li l-Kummissarju talab biex ningħata rikonoxximent.
X’kienet il-ħidma sinjifikanti tiegħek biex finalment irbaħt dan l-unur?
Kont qiegħed xogħol waqt attivitá fid-distrett u b’mod stantanju rnexxieli nimpedixxi milli jiġu milquta żewġ persuni billi warrabthom u żammejt l-istruttura magħmula mill-injam li kienet fuq ħadida ta’ xi 200kg milli taqa’ fuq it-tfal li kienu qed jilagħbu quddiemna, u dan kien ta’ sogru għal ħajti!
Kif jilqgħukom in-nies hemm barra bħala Pulizija?
Jiddependi skont min ikunu n-nies li niltaqgħu magħhom. Hemm min japprezza x-xogħol tagħna, u hemm min il-ħin kollu jmaqdar jew ma japprezzax biżżejjed.
Intom li tant tkunu viċin tan-nies, kif tarawha s-soċjetá Maltija hemm barra u kif inbidlet tul is-snin ?
Iva jekk nista’ nwieġeb għal dawn it-23 sena, in-nies rajtha li nbidlet anke fil-konfront tal-imġieba tagħha mal-Pulizija. Hemm nukleu ta’ nies li baqgħu jirrispettaw il-Pulizija bħala awtoritá, iżda min-naħa l-oħra speċjalment il-ġenerazzjoni aktar ‘il hawn, il-Pulizija sa ċertu punt jarawha bħala istituzzjoni, iżda mhux b’dak ir-rispett li kienet tirċievi fis-snin l-imgħoddija.
Dan għalkemm b’mod ġenerali, il-Pulizija f’Malta tidher li hija waħda mill-istituzzjonijiet li l-pubbliku jafda fiha.
Għaddi messagg finali lil min jixtieq isir Pulizija.
Li l-Pulizija aktar minn xogħol … hija vokazzjoni nobbli u subblimi li permezz tagħha s-soċjetá timxi f’ordni u tħossha li hemm xi ħadd li jista’ jiddefendiha u jipproteġiha minn azzjonijiet ġejjin minn sorsi ta’ ħażen, qerq u għelt.
Kull min jagħżel din il-karriera għandu jġib quddiem għajnejh illi se jagħmel dan għas-servizz u l-ġid tal-oħrajn b’integritá!