Raġel mis-Serbja armat b’armi tan-nar u skieken ġie arrestat matul dan il-lejl wara aktar minn sitt sigħat ta’ negozjati mal-Pulizija. Ir-raġel, ta’ 38 sena, issakkar fl-appartament tiegħu fil-Pietà flimkien ma’ klieb imħarrġa għall-ġlied. Il-Pulizija ssejħu fuq il-post, fi Triq Qrejten, wara li allegatament ir-raġel beda jhedded lil xi persuni bi skieken u anke għamel ħsara fuq vetturi privati.
Meta l-Pulizija ħabbtu fuq il-bieb tar-residenza tiegħu, ir-raġel allegatament wera lill-uffiċjali sikkina kbira u pponta arma tan-nar fid-direzzjoni tagħhom u hedded li jispara.
Fl-appartament ir-raġel kellu tlett iklieb imħarrġa għall-ġlied.
Uffiċjali mir-Rapid Intervention Unit u mill-iSpecial Intervention Unit iċċirkondaw il-binja u ppruvaw jinnegozjaw mar-raġel. Il-Kummissarju tal-Pulizija Angelo Gafà kien ukoll fuq il-post.
Il-Pulizija ħadu l-kontroll tas-sitwazzjoni għall-ħabta tas-2.00 a.m. meta sparaw flashbangs bil-għan li jiddiżorjentaw is-suspettat.
Kien hawn li l-pulizija sgassaw il-bieb tal-appartament tiegħu u daħlu ġewwa. Il-Pulizija kienu kostretti jisprataw żewġ tiri lil wieħed mill-klieb tar-raġel wara li attakka lil uffiċjal tal-Pulizija.
Waqt l-arrest is-Serb instab fuq is-sodda u fidejh kellu senter u pistola kkargata. Minn tfittxija li saret fir-residenza nstabu mijiet ta’ skrataċ, għaxar oġġetti oħrajn bejn skieken u xwabel kif ukoll armi bil-ponta magħmulin mill-injam.
Aktar tard żewġt iklieb oħrajn li wkoll kienu perikolużi ttieħdu minn fuq il-post mill-uffiċjali tad-Dipartiment tal-Ħarsien tal-Annimali. Fuq il-post kien hemm tim mediku tal-Emerġenza mill-Isptar Mater Dei f’każ ta’ bżonn, iżda b’xorti tajba ħadd ma weġġa’ f’dan l-inċident.
Dwar dan il-każ qed issir inkjesta mill-Maġistrat Neville Camilleri.
Ritratti: Uffiċċju tal-Komunikazzjoni, Il-Korp tal-Pulizija ta’ Malta
