Il-Pulizija qed tinvestiga serqa minn ħanut, li seħħet ilbieraħ filgħaxija, fiż-Żejtun.
Kien għall-ħabta tat-8.00 p.m. meta l-Pulizija kienet infurmata bis-serqa, li seħħet fi Triq l-Isqof Emm. Galea.
Mill-ewwel stħarriġ tal-Pulizija rriżulta li żewġt irġiel mgħammda u armati b’sikkina, daħlu fil-ħanut u talbu l-flus lill-kaxxiera – żewġ nisa ta’ 40 sena u 25 sena rispettivament.
Iż-żewġt irġiel ħarbu minn fuq il-post wara li serqu ammont ta’ flus kontanti. Il-kaxxiera ma sofrew l-ebda ġrieħi f’dan l-inċident.
Bil-każ ġiet infurmata l-Maġistrat tal-Għassa Dr Elaine Mercieca li fetħet inkjesta filwaqt li l-Pulizija għaddejja bit-tfittxija għaż-żewġt irġiel involuti fis-serqa.
L-investigazzjonijiet għadhom għaddejjin.
