Din faċli li wieħed jarah meta jħares x’qed jagħmlu dawn il-pajjiżi fil-ġlied li kien hemm u għadu għaddej bejn l-Israjel u l-Palestinjani. Il-Punent kull ma jrid hu li l-Iżrael ikompli jiddomina dawn in-naħat. Dan għaliex l-Israel hu favur il-Punent u qed jaqdieh. L-isfortuna hi li llum x’qed jiġri f’dawn il-pajjiżi ma tantx jissemmew – kważi xejn. Qiesu l-ġlied u terrur fuq il-Palestinjani spiċċa!
Insemmi ftit affarijiet li ġraw u qed jiġru f’dan il-qasam. Nibdew b’Gaża. Jekk nieħdu l-UE u anki l-Istati Uniti, dawn jissapportjaw u lesti li jgħinu lill-Israel jiddomina lill-Gaża u jkompli jkeċċi lill-Palestinjani minn pajjiżhom. Dan qed jagħmluh billi jipporvdu l-armi kollha li għandha bżonn Iżrael biex tkompli dan. Barra minhekk qed jopponu li l-Palestinjani għadu jkollhom pajjiżhom. Peress li l-qtil ta’ nies f’Gaża kien wieħed qawwi, ħafna aktar minn tal-Ukranja għax ilaħħaq aktar minn 33,000 persuna, ħafna minnhom nisa u tfal, biex ma jidhrux koroh qed jagħmlu żewġ affarijiet.
L-ewwel naraw mill-aħbarijiet. Bħalissa qiesu mhu qed jiġri xejn f’Gaża għaliex l-aħbarijiet m’għadhomx interessati u m’huma jsemmu xejn. Barra l-fatt li l-ġlied għadu għaddej, bħalissa hemm ħafna affarijiet li qed isiru, imma ma jissemmewx. Insemmi tnejn. Gruppi Iżraeljani qed jippressaw b’theddid lill-Palestinjani fuq in-naħa ta’ fuq biex idabbru rashom u jitilqu minn hemm biex l-Iżraeljani jokkupawh huma. Bara dan hemm eluf ta’ Palestinjani li spiċċaw il-ħabs mingħajr akkużi. Mhux talli hekk, hemm rapporti li fost dawn kien hemm imwiet fosthom nies li jidher li qabel ma mietu kienu ġew imsawta u anki ma ingħatawx il-mediċini li kellhom bżonn. Fosthom hemm Dr Adbab Al-Bursh li kien il-kap tas-sezzjoni ortopedika f’isptar Al Shifa, l-akbar sptar ġeww Gaża.
Jekk nieħdu l-isports u anki affarijiet oħra, fosthom il-Eurovision insibu li filwaqt li r-Russi qed jiġu ristretti milli jkomplu jieħdu sehem, ma l-Iżrael ma jsir xejn. Qiesu l-Iżrael mhu qed jagħmel l-ebda ħsara lin-nies Palestinjani komuni. Issa ħalliha li il-ħsara li l-Iżrael għamel fuq in-nies f’Gaża hi ħafna akbar milli r-Russi għamlu ġo l-Ukranja. Li kieku kienu onesti, kienu jittrattaw lill-Iżrael bħal ma qed jittrattaw lir-Russi għalkemm jien nemmen li l-Paċi inġibuha biss jekk min qed jiġġieled jitkellmu ma xulxin.
Insemmi ħaġa oħra. Din id-darba fuq l-Iran. Il-kwistjoni li hemm bejn il-punent u l-Iran hi għaliex dan il-pajjiż kien qed jaħdem biex ikollu bombi nukleari. Li jkun hemm restrizzjonijiet fuq l-armi nukleari mhix ħażina. Imma biex tkun ġusta, din tkun trid tapplika għal kulħadd l-istess. Mhux talli ma taplikax għal pajjiżi tal-Punent u Russja għax ħadd minnhom ma naqqas dawn l-armi, imma kien hemm pajjiżi oħra f’istess sezzjoni tad-dinja li ħadmu u kiesbu l-bombi nukleari u ħadd la tkellem kontrihom u lanqas ħa passi kontrihom. Fosthom hemm l-Iżrael, il-Pakistan u l-Indja. Imma għal dawn ma jimpurtax.
Nieħdu l-protesti. Bħalissa hemm protesti qawwijja li qed isiru biex tieqaf il-gwerra f’Gaża sew fl-Amerika u sew fl-Ingilterra. Dawn qed jipprotestaw biex il-gvernijiet tagħhom jieħdu passi biex tieqaf din il-gwerra li qed iġġib ħafna qtil ta’ nies komuni. Qed jagħmlu hekk għax il-gvernijiet ta’ dawn il-pajjiżi barra li għandhom influwenza kbira biex iwaqqfu din il-gwerra m’huma jagħmlu xejn biex ma jkomplux jinqatlu l-Palestinjani u dawn jerġgħu jingħataw pajjiżhom lura. Imma minflok il-gvernijiet ta’ dawn il-pajjiżi qed jisimgħu lill-poplu tagħhom, qed jgħamlu kull sforz biex iwaqqfu dawn il-protesti. Ir-riżultat diġa’ qed jidher fl-Ingilterra għaliex l-akbar żewġ partiti, il-konservattivi u l-labour jidher li naqqsu is-support tagħhom fl-elezzjonijiet reġġjonali ta’ dawn l-aħħar. Dan għaliex in-nies PAĊI jridu u la armi, la gwerrer u lanqas poter.
Imma hemm ipokrezija oħra aktar serja. Peress li riżultat tal-ġlied li hemm f’Gaża, in-nies u speċjalment tfal mhux qed ikollhom x’jieklu u sezzjoni mhux żgħira qed imutu bil-ġuħ, il-pajjiżi tal-Punent qed jibgħatu l-ikel għan-nies ta’ Gaża. Imma fl’istess ħin, l-ebda pajjiż minnhom ma naqqas li jkompli jibgħat l-armi lill-Iżrael. Hi ipokrezija għaliex filwaqt li qed nibgħat l-ikel biex in-nies ma jmutux bil-ġuħ, qed inkompli nibgħat l-armi lill-min qed joqtolhom permezz tas-suldati tiegħu. Għalhekk dawn il-pajjiżi huma oqbra mbajda.
