Il-Qorti tal-Maġistrati ddikjarat l-arrest ta’ żagħżugħ ta’ 15-il sena f’ċentru ta’ rijabilitazzjoni mid-droga bħala wieħed illegali u dan minħabba informazzjoni mhux preċiża li kienet ingħatat lill-pulizija.
Din id-deċiżjoni ngħatat mill-Maġistrat Marse-Ann Farrugia l-Erbgħa filgħaxija, filwaqt li ordnat lill-minuri biex jerġa’ jittieħed lura fiċ-ċentru.
L-inċident seħħ wara seduta fejn il-minuri ġie mixli li kiser il-kundizzjonijiet tal-pleġġ stabbiliti mill-Qorti tal-Minorenni.
Fil-5 ta’ Ġunju, iż-żagħżugħ ingħata l-libertà proviżorja bil-kundizzjoni li jtemm programm residenzjali biex jindirizza d-dipendenza tiegħu mid-droga.
Għalkemm fil-bidu wera progress, il-minuri wera l-intenzjoni li jieqaf mill-programm nhar it-22 ta’ Ġunju. L-uffiċjali fiċ-ċentru, iddiskutew post alternattiv mas-servizzi soċjali.
Madankollu, l-Erbgħa filgħodu, il-ħaddiema taċ-ċentru għamlu kuntatt mal-pulizija, fejn sostnew li l-minuri kien ipprova jaħrab mill-post. Fuq din l-informazzjoni, il-pulizija arrestat u akkużat lill-minuri, filwaqt li talbet għall-konfiska tal-garanzija personali ta’ €2,000. Min-naħa l-oħra, l-Avukati tal-minuri kkontestaw il-validità tal-arrest.
Mill-provi mressqa fil-Qorti rriżulta li għalkemm il-minuri xtaq li jieqaf mill-programm ta’ rijabilitazzjoni, huwa fil-fatt ma kienx ipprova jaħrab. Il-Qorti nnutat li l-minuri ma kien iffirma l-ebda dokument li jikkonferma li se jitlaq u lanqas ma wera xi intenzjoni li jaħrab.
Il-Qorti qieset l-arrest bħala illegali u l-akkuża ma kinitx sostanzjata minħabba l-informazzjoni “fattwalment skorretta” mogħtija lill-prosekuturi.
Il-Qorti enfasizzat li l-uffiċjali tar-rijabilitazzjoni kellhom jinfurmaw lill-awtoritajiet tas-servizzi soċjali, li għandhom il-kustodja tal-minuri, dwar it-terminazzjoni tal-programm, u huma, min-naħa tagħhom, setgħu jinnotifikaw lill-pulizija.
Il-Maġistrat irrimarkat ukoll dwar l-età tal-akkużat, u saħqet fuq il-ħtieġa ta’ sensittività u sensibilità fit-trattament ta’ minorenni.
Konsegwentement, il-Qorti ordnat ir-ritorn immedjat tal-minuri fiċ-ċentru u ddikjarat l-arrest illegali.
L-Avukati Mario Mifsud u Nicholas Mifsud dehru għall-imputat.