Il-UEFA reġgħet fetħet l-offerti għall-istadiums biex jospitaw il-finali taċ- Champions League tal-2027, wara li l-partita tneħħiet minn Milan.
San Siro kellu jkun il-post tal-vetrina għal din il-finali iżda uffiċjali ta’ Milan naqsu milli jassiguraw lill-Federazzjoni Ewropea li x-xogħol ta’ żvilupp mill-ġdid ippjanat mhux se jfixkel l-avveniment.
Għaldaqstant il-Kumitat Eżekuttiv tal-UEFA ddeċieda li jospita l-finali fi stadium ieħor.
Iż-żewġ clubs ta’ din il-belt, AC Milan u Inter qed jikkunsidraw li jibnu stadium ġdid fiż-żona ta’ San Siro.
Jingħad li l-istadium li se jospita l-finali msemmija, mistenni jitħabbar, f’Mejju jew Ġunju tas-sena d-dieħla.
Id-deċiżjoni ttieħdet f’laqgħa tal-Kumitat Eżekuttiv, nhar it-Tlieta li għadda, fejn ġie miftiehem ukoll tibdil fil-fondi ta’ solidarjetà tal- organizzazzjoni.
Il-Big Five tal-kampjonati Ewropej – il-Premier League, La Liga, Ligue 1, is-Serie A u l-Bundesliga – qablu li l-pagamenti ta’ solidarjetà tagħhom ikunu limitati għal €10 miljun kull staġun sat-tmiem dak tal-2026-27.
Din hija żieda ta’ €1.5 miljun fuq il-perjodu preċedenti, iżda issa hemm €308 miljun li għandhom jinqasmu minflok il-€177.2 miljuni tal-perjodu preċedenti.