Il-UEFA se torganizza laqgħa ta’ emerġenza nhar il-Ġimgħa biex “tivvaluta s-sitwazzjoni” dwar l-invażjoni tar-Russja fl-Ukrajna bir-Russja se tospita l-finali taċ-Champions League f’San Pietruburgu f’Mejju.
“Wara l-evoluzzjoni tas-sitwazzjoni bejn ir-Russja u l-Ukrajna fl-aħħar 24 siegħa, il-president tal-UEFA ddeċieda li jsejjaħ laqgħa straordinarja tal-Kumitat Eżekuttiv għall-Ġimgħa 25 ta’ Frar fl-10.00am, sabiex jevalwa l- sitwazzjoni u tieħu d-deċiżjonijiet kollha meħtieġa,” qalet il-UEFA fi stqarrija.
Il-finali tal-kompetizzjoni ewlenija tal-football tal-clubs Ewropej hija skedata li tintlagħab fit-28 ta’ Mejju fil-Gazprom Arena f’San Pietruburgu, li diġà ospitat diversi logħbiet fil-Kampjonat Ewropew tas-sena l-oħra u fit-Tazza tad-Dinja tal-2018 li saret fir-Russja.
Il-korp governattiv tal-football Ewropew għandu ftehim ta’ sponsorizzazzjoni maġġuri ma’ Gazprom, il-ġgant tal-enerġija tal-istat Russu.
Il-Prim Ministru Brittaniku Boris Johnson qal nhar it-Tlieta li r-Russja ma kellha “l-ebda ċans” li tospita l-finali taċ-Champions League jekk hi tinvadi l-Ukrajna.
Bħalissa hemm erba’ clubs tal-Premier League Ingliż li għadhom involuti fl-aħħar 16 taċ-Champions League ta’ dan l-istaġun, fosthom Chelsea u Manchester City, li kkontestaw il-finali tal-istaġun li għadda f’Porto, il-Portugall.
Il-UEFA diġà kellha ċċaqlaq l-aħħar żewġ finali taċ-Champions League minħabba l-pandemija minn Istanbul għal Lisbona fl-2020, u mbagħad għal darb’oħra mill-belt Torka għal Porto is-sena l-oħra.
Il-finali taċ-Champions League ttellgħet l-aħħar fir-Russja fl-2008, meta Manchester United kienu għelbu lil Chelsea bil-penalties f’Moska.
Zenit Saint Petersburg, iċ-champions renjanti Russi u l-leaders attwali tal-kampjonat, għadhom involuti f’kompetizzjoni tal-UEFA dan l-istaġun u għandhom jilagħbu kontra Real Betis fi Spanja fl-Europa League nhar il-Ħamis.
Il-kampjonat Ukren, li kellu jerġa’ jibda fi tmiem il-ġimgħa wara l-waqfa twila tax-xitwa, ġie sospiż.
“Se nirreżistu,” kitbu fuq Twitter Shakhtar Donetsk, it-13-il darba champions tal-Ukrajna li ilhom tmien snin eżiljati mill-belt ta’ oriġini tagħhom diġà mifnija bil-gwerra, fuq Twitter, flimkien ma’ stampa tal-bandiera tal-Ukrajna.
