L-ASA irriproduċiet il-komunikazzjoni pubblika konġunta tal-World u l-European Aquatics tal-investigazzjoni dettaljata tagħhom dwar l-attività relatata mal-imħatri ta’ xi atleti Maltin.
Fi stqarrija l-ASA qalet li: “Dan ir-rapport jikkonferma bis-sħiħ il-pożizzjoni tal-ASA li, mill-bidu nett, insistiet li qatt ma kien seħħ match fixing jew illegalità. L-uniku ksur li l-atleti tagħna nstabu ħatja tiegħu huwa l-etika ta’ World Aquatics li ma tippermettilhomx jagħmlu imħatri (betting) fuq xi sport akkwatiku kullimkien madwar id-dinja.”
“Minħabba n-nuqqas ta’ għarfien tagħhom ta’ din ir-regola, kull wieħed mill-players investigati ġie sospiż għal xahar minn kwalunkwe attività akkwatika.”
L-ASA pproduċiet t-test sħiħ tar-rapport ippubblikat:
“European Aquatics hija kuntenta li tħabbar li l-Unità tal-Integrità tal-Akwatiċi (AQIU) ikkonkludiet investigazzjoni tal-integrità dwar ksur relatat mal-imħatri tal-Kodiċi tal-Integrità tal-World Aquatics li jinvolvi ħdax (11) –il player Malti tal-waterpolo u ‘athlets support personnel’ għal atleta wieħed (1).”
“L-investigazzjoni twettqet permezz ta’ kooperazzjoni mill-qrib bejn l-AQIU, l-Assoċjazzjoni tal-Isport Akwatiku ta’ Malta (ASA), l-Awtorità għall-Integrità fl-Isport Malti (AIMS), il-European aquatics, il-Malta Gaming Authority (MGA), u l-Olympic Movement Unit dwar il-Prevenzjoni tal-Manipulazzjoni tal-Kompetizzjonijiet, li turi l-effettività ta’ azzjoni kkoordinata fil-protezzjoni tal-integrità tal-isports akkwatiċi.”
Id-dettalji tad-deċiżjonijiet huma disponibbli hawn taħt.
“Matul l-investigazzjoni, ġie stabbilit li l-ebda wieħed mill-individwi ma għamel imħatri fuq logħbiet li fihom ipparteċipa, u ma ġiet identifikata l-ebda evidenza ta’ manipulazzjoni tal-logħbiet jew iffissar tal-kompetizzjonijiet.”
“Minbarra l-miżuri imposti taħt il-Kodiċi tal-Integrità tal-World Aquatics, l-individwi kkonċernati se jipparteċipaw f’inizjattivi edukattivi u ta’ sensibilizzazzjoni matul il-ħames snin li ġejjin, billi jaħdmu mal-AQIU biex isaħħu l-fehim tar-riskji tal-integrità relatati mal-betting u jikkontribwixxu għall-prevenzjoni ta’ ksur tar-regoli fil-futur fil-komunità akkwatika kollha.”
“L-AQIU tesprimi l-apprezzament tagħha lill-ASA, l-Awtorità għall-Integrità fl-Isport Malti (AIMS), il-European Aquatics, il-Malta Gaming Authority, u l-Olympic Movement Unit dwar il-Prevenzjoni tal-Manipulazzjoni tal-Kompetizzjonijiet għall-kooperazzjoni, it-trasparenza u l-impenn eċċellenti tagħhom matul l-investigazzjoni. Dan l-approċċ kollaborattiv jenfasizza d-determinazzjoni kondiviża ta’ organizzazzjonijiet internazzjonali u nazzjonali biex jissalvagwardjaw l-integrità tal-isport akkwatiku permezz tal-edukazzjoni, il-prevenzjoni u l-governanza effettiva.”
Tfakkira dwar l-Integrità: L-Imħatri fuq l-Isports Akwatiċi huma projbiti
“F’isem l-AQIU, il-European Aquarics tixtieq tfakkar lill-atleti kollha u lill-persunal ta’ appoġġ tal-atleti li l-imħatri fuq kwalunkwe dixxiplina akkwatika huma strettament ipprojbiti skont il-Kodiċi tal-Integrità tal-World Aquatics. Din il-projbizzjoni tapplika irrispettivament mil-livell ta’ kompetizzjoni u tinkludi kemm it-tqegħid ta’ mħatri direttament kif ukoll il-faċilitazzjoni tal-imħatri minn oħrajn. L-atleti li jipparteċipaw fil-Logħob Olimpiku huma wkoll ipprojbiti milli jimħatru fuq kwalunkwe avveniment jew kompetizzjoni Olimpika.”
