Illum, fil-Port il-Kbir issir ir-Regatta tal-Vitorja hekk kif l-interess qed jerġa’ jikber għal dawn it-tiġrijiet tradizzjonali.
Bħas-soltu, ir-Regatta se tkun maqsuma f’żewġ kategoriji – dik Open u dik “B”. Bħas-soltu, dan l-avveniment jiftaħ bit-tiġrija tal-frejgatini tan-nisa.
Fl-aħħar edizzjoni, dik tal-2022, Bormla reġgħu rritornaw għad-dominanza hekk kif rebħu d-double. Kien f’dik preċedenti li Marsa (2020) rebħu l-Aggregate Shield biex waqqfu l-monopolju ta’ Bormla li kienu ġejjin minn tliet rebħiet konsekuttivi.
L-istess f’Kategorija B, wara erba’ snin infila mirbuħa minn Bormla, kienu Birżebbuġa (2020) li taw skoss lill-Bormliżi biex kien it-tieni suċċess tagħhom wara li kienu rebħu dik tal-2008.
Ta’ min isemmi wkoll li fl-2021 ir-regatta ma’ saritx minħabba l-Covid-19.
Bħas-soltu tmien timijiet se jieħdu sehem f’din ir-regatta li jinkludu lil Birżebbuġa, Isla, Birgu, Marsamxett, Marsa, Kalkara u Siggiewi, b’dawn tal-aħħar tkun it-tieni darba li jkunu qed jieħdu sehem.
F’komunikat, l-Għaqda Regatta Nazzjonali qalet li r-Regatta għadha uffiċjalment skedata (għal-lum). Hija sostniet li l-clubs parteċipanti se jiltaqgħu filgħodu sabiex isir assesjar tas-sitwazzjoni u tittieħed id-deċiżjoni finali. Dan sar minħabba l-maltemp li laqat il-Gżejjer Maltin matul dawn l-aħħar jiem.
L-ewwel tiġrija tibda fis-1.00 pm.
