Imħallef f’Ohio ordna lil sptar biex jitratta pazjent marid bil-Covid-19 bil-mediċina Ivermectin. Dan minkejja li hemm twissijiet minn esperti li din il-mediċini li tintuża fuq l-annimali, mhix pruvata li hi effettiva kontra l-virus u saħansitra hi perikoluża jekk tittieħed f’dożi qawwijin.
Gregory Howard, imħallef minn Butler County li tinsab f’Cincinnati, ordna lit-tobba fl-isptar ta’ West Chester biex jamministraw l-Ivermectin lil Jeffrey Smith, pazjent marid bil-Covid-19 li għandu 51 sena.
Hu kien ġie infettat bil-virus f’Lulju li għadda u kien spiċċa fit-Taqsima tal-Kura Intensiva.
Martu iddikjarat li “żewġi jinsab fuq l-għatba tal-mewt. M’għandux għażliet oħra.” Tabib li ma jaħdimx f’dan l-isptar kien lest li jagħti din id-droga lil dan il-pazjent. Ġara imma li t-tobba tal-isptar ma kienux lesti li jtuhielu.
Hu fetaħ proċeduri fil-Qorti u l-imħallef ordna li l-pazjent jingħata l-mediċina ivermectin, mediċina li normalment tintuża għaż-żwiemel u l-baqar għal kontra l-parassiti.
L-FDA fl-Istati Uniti kienet wissiet li jekk din il-mediċina tittieħed f’ammont qawwijin, tista’ tkun perikoluża.
