Fl-aħħar jiem komplejna naraw aktar imwiet f’Gaża. Aktar attakki. Kull tentattiv biex dan il-kunflitt jintemm ma taw ebda riżultat. Meta tara dawk l-imwiet ta’ nies innoċenti, meta tara kif sptarijiet u skejjel u anke kampijiet ta’ nies bla saqaf fuq rashom ġew attakkati ma tistax ma tistaqxi, għaliex wara kważi sentejn mill-bidu ta’ kunflitt, dan baqa’ għaddej, bi ħruxijiet kbar.
Raġunijiet hemm diversi. Ma’ tistax tgħid li hemm raġuni waħda. Hu fatt illum li Netanyahu, qed juża dan il-kunflitt għal skop politiku. Irid jurt li lest jagħmel kollox għaċ-ċittadini Iżraljani u dan għax fi żmien il-bidu tal-kunflitt il-popolarità tiegħu kienet bdiet tonqos.
Netanyahu iwieġeb għall-kritika li ssirlu li qiegħed itawwal il-gwerra, bl-argument li kull kritika għal gwerra ta’ Iżrael f’Gaża qiegħda twassal biex il-Ħamas ma jibdlux il-pożizzjoni tagħhom. Fil-pubbliku konna qegħdin naraw messaġġi mill-President Donald Trump li jrid li tintemm il-gwerra u li jinħelsu l-ostaġġi. Rajna imma rappreżentant ta’ l-istess Trump jitlaq ‘barra minn laqgħa biex jieqfu l-attakki bl-argument ikun li kien tort tal-Ħamas.
Rajna li bilgħan li ssir pressjoni fuq Iżrael għadd ta’ gruppi u attivisti bdew protesti f’Iżrael. Il-messaġġ tagħhom hu ċar – jiddikjaraw li Netanyahu qiegħed itawwal il-gwerra biex jibqa’ fil-poter. Ma ninsewx li l-koalizzjoni tal-Gvern ta’ Netanyahu tiddependi sew fuq partiti tal-lemin estrem. Dawn huma partiti li jridu li titkompla l-gwerra sakemm il-Ħamas jinqerdu kompletament. Mhux biss imma jridu ukoll li jkun hemm ir-rilokazzjoni tal-Palestinjani lejn pajjiżi oħra. Heddew li jirtiraw l-appoġġ jekk ma jkunx hemm rebħa totali. Quddiem dan kollu Netanyahu jibqa’ jargumenta li l-gwerra trid titkompla sakemm l-ostaġġi kollha jirritornaw lura u l-Ħamas joħorġu telliefa. Jargumenta li jekk il-Ħamas ma jinqerdux, ikun ifisser li jistgħu jwettqu attakk ieħor kbir bħal dak li għamlu.
Il-Ħamas minn naħa tagħhom jiddikjaraw li lesti jeħilsu l-ostaġġi basta jinħelsu priġunieri Palestinjani u li Iżrael jirtira minn Gaża.
Wieħed ma jistax ma jħarisx lejn x’ġara f’Ġunju. Dakinhar fil-kunflitt bejn Iżrael u l-Iran. Trump kien għamel kuntatt ma’ Netanyahu biex l-attakki jieqfu. Kien intervent li warajh waqaf il-kunflitt. Fir-rigward ta’ Gaża, ma kien hemm xejn minn dan. Rajna matul l-aħħar ġimgħat lil Trump jappella lill-Ħamas biex jeħilsu l-ostaġġi, iżda ma rajnieh jagħmel l-ebda pressjoni fuq Iżrael. Mhux hekk biss iżda hu rappurtat li l-Istati Uniti kompliet tipprovdi biljuni ta’ Dollari f’armi lil Iżrael, użat is-saħħa tagħha fin-Nazzjonijiet Uniti biex tipproteġi lil Iżrael.
Hu ċar minn dak li rajna fl-aħħar xhur u ġimgħat li l-Istati Uniti żammiet il-bogħod milli tesprimi ruħha b’mod ċar dwar il-kriżi tal-ġuħ li qiegħed ibati minnha l-poplu Palestinjan u dan minħabba l-imblokk li kien għamel Iżrael. Mhux hekk biss iżda l-Istati Uniti attakkat bil-qawwi lill-Qorti Kriminali Internazzjonali. Ma’ dan hemm il-fatt li Donald Trump u l-amministrazzjoni tiegħu qed joffru appoġġ bla kundizzjonijiet lill-Prim Ministru Iżraeljan.
Għal xhur sħaħ, għaqdiet non governattivi u aġenziji tan-Nazzjonijiet Uniti kienu wissew li l-kriżi ta’ ġuħ kienet inevitabbli minħabba l-mod kif kien qed jirraġixxi Iżrael. L-offensiva militari l-ġdida ta’ Iżrael li qed thedded il-Belt ta’ Gaża tista’ tagħmel il-kriżi tal-ġuħ ħafna agħar.
Illum is-sitwazzjoni hi ċara ħafna. Kważi sentejn ta’ gwerra, li fihom l-armata Iżraeljana qerdet kważi l-art agrikola kollha ta’ Gaża. Ħassret il-produzzjoni lokali tal-ikel. It-telf ma ġiex ikkumpensat minn żieda fl-għajnuna internazzjonali għall-ikel. Wara li ssospenda l-għajnuna kompletament għal xahrejn u nofs fil-bidu tas-sena, il-gvern Iżraeljan ippermettielha terġa’ tibda b’termini li kienu kkunsidrati kompletament inadegwati fid-dawl tal-ħtiġijiet dejjem jiżdiedu.
M’hemm ebda dubju li l-mod kif twarrbu l-għaqdiet non governattivi u l-aġenziji tan-Nazzjonijiet Uniti u l-mod kif twaqqfet fondazzjoni bejn l-Iżrael u l-Istati Uniti, inħolqu effetti mill-agħar għall-Palestinjani, li saħansitra kien hemm minnhom inqatlu waqt li marru jistennew għall-ikel.
Rajna tfal, persuni vulnerabbli u nies oħra li spiċċaw għadma u ġilda. Rajna tfal litteralment imutu bil-ġuħ wara li spiċċaw litteralment skeletri. Katastrofi umana.
Żgur li din il-katastrofi qatt ma kienet isseħħ kieku l-gvern Iżraeljan ma ddeċidiex b’mod strateġiku li juża l-kriżi ta’ ġuħ bħala arma tal-gwerra.
Li żona fid-dinja tintlaqat mill-ġuħ mhux xi ħaġa li qatt ma smajna. Żoni ta’ kunflitt madwar id-dinja minn żmien għal żmien jesperjenzaw il-ġuħ. Biss is-sitwazzjoni f’Gaża hija unika. Dan għax hi attribwibbli għal reġim demokratiku rikonoxxut bħala tali mill-blokk tal-Punent kollu. Din il-katastrofi umana sa issa kisbet impunità totali.
Impunità li tistrieħ primarjament fuq l-appoġġ kontinwu u inkundizzjonat tal-Istati Uniti. Appoġġ li fuqhom il-Prim Ministru Benjamin Netanyahu jaf li jista’ jistrieħ. L-amministrazzjoni ta’ Donald Trump, marret saħansitra aktar ’il bogħod fl-appoġġ tagħha. Iddistanzjat ruħha wkoll mid-dikjarazzjoni tal-ġuħ.
L-Istati Uniti ma waqfitx hemm. Mexxiet kampanja ħarxa kontra l-Qorti Kriminali Internazzjonali (ICC), li ħarġet mandati ta’ arrest għall-Prim Ministru Iżraeljan u l-eks Ministru tad-Difiża Yoav Gallant talli uża l-ġuħ bħala arma ta’ gwerra. Il-protokolli addizzjonali għall-Konvenzjonijiet ta’ Ġinevra tal-1949 jipprojbixxu b’mod ċar atti bħal dawn, li jikkostitwixxu delitti tal-gwerra.
Nemmnu li din hi kompliċità tal-stati Uniti. Li mhix lesta li tagħmel pressjoni fuq Iżrael. Qiegħda tkun indifferenti. Iddawwar wiċċha banda oħra. L-istess kif qiegħda tagħmel l-Unjoni Ewropea. Kultant jitfgħu xi dikjarazzjoni fl-ajru, imma s’hemm biss jaslu. Din l-impunità turi ħaġa waħda biss. Falliment politku u fallimet morali. Falliment li għandu prezz. Prezz kbir ta’ ħajja umana. Il-qtil ta’ persuni innoċenti.