Bażi tal-ajru ta’ żmien l-era Sovjetika ġewwa l-Albanija se tkun qiegħda tiġi konvertita b’bażi ta’ operazzjoni tan-NATO. Dan ifisser li n-NATO issa se jkollha bażi fil-Punent tal-Balkani, liema bażi mistennija li tinfetaħ is-sena li ġejja.
Fil-preżent in-nefqa militari fl-Ewropa żdiedet b’mod sostanzjali – speċjalment fil-Ġermanja – u anke fil-Balkani. Ix-xogħol fil-bażi tal-ajru ta’ Kuçovë beda f’Jannar li għadda u meta titlesta din se jkollha l-kapaċità li tilqa’ numru ta’ ajruplani militari moderni.
In-NATO u l-Albanija se jkunu qegħdin jinvestu s-somma ta’ €50 miljun għar-rinovar ta’ din il-bażi li tinsab 85 kilometru fin-Nofsinhar tal-kapitali Tirana.
Oriġinarjament din il-bażi kienet inbniet fis-snin 50 meta l-Albanija kienet taħt it-tmexxija ta’ Enver Hoxha, li għalkemm kien komunist kien jirreżisti lill-Unjoni Sovjetika.