Fit-Tramuntana ta’ Kalifornja kompliet għaddejja l-ħidma intensiva biex jiġu kkontrollati n-nirien kbar li wasslu biex żewġ persuni tilfu ħajjithom u eluf kellhom iħallu djarhom. Iż-żewġ persuni li tilfu ħajjithom instabu mejta fil-karozza fid-driveway tad-dar tagħhom u jidher li dawn ma rnexxilhomx jaħabru hekk kif ir-residenza tagħhom ħadet in-nar.
In-nirien imlaqqma bħala McKinney qerdu iktar minn 55,000 ettaru ta’ art, u b’hekk dawn huma l-ikbar nirien li laqtu lil Kalifornja din is-sena. Fid-dawl ta’ dan, il-Gvernatur Gavin Newsom iddikjara stat ta’ emerġenza u b’hekk se jkunu jistgħu jiġu aċċessati fondi statali biex jiġu miġġielda dawn in-nirien. Jikkumbattu din is-sitwazzjoni hemm madwar 650 pumpier, iżda s’issa dawn ftit li xejn kellhom suċċess hekk kif in-nixfa u r-riħ qegħdin jikkumplikaw il-ħidma tagħhom.
Kawża ta’ hekk, madwar 2,000 resident li joqogħdu madwar Klamath National Forest ġew mitluba biex jevakwaw djarhom.
