Kif bdiet l-imħabba tiegħek lejn il-waterpolo?
Din l-imħabba tmur lura ħafna żmien meta aħna konna ninżlu għas-sajf villeġġatura f’Wied il-Għajn.
Kont niġbed lejn in-naħa tal-pitch biex nistad u naturalment bdejt it-taħriġ mal-club.
Ma tantx domt nilgħab, biss peró meta kelli 19- il-sena (1994) konna waqqafna Supporters Club Ta’ Marsaskala Sports Club.
Sentejn biss wara tlajt elett fil-kumitat dak iż-żmien immexxi minn Renald Dalli (tal-Wurth) u kien proprju sena wara, fl-1997, fejn il-club rebaħ l-ogħla unur fl-istorja tal-club meta rbaħna l-Kampjonat Premier. Minn dak iż-żmien qatt ma tlaqt lill-club … kemm fit-tajjeb kif ukoll fil-ħażin.
Kif iddeċidejt li tidħol fl- amministrazzjoni tal-waterpolo bħala president ta’ Marsaskala?
Qatt ma xtaqt li nidħol għal responsabbiltá kbira bħal din, onestament. Biss peró meta llum tara li l-volontarjat qiegħed jonqos u huwa ferm difficli li ssib nies li jikkommettu ruħhom.
Jien ma tantx kelli wisq għażliet milli nara lill-club tiegħi jegħreq. Erfajt din il-kariga b’responsabiltá u llum nistqarr li ma jiddispjaċinix li ilni disa’ snin president tal-club.
Kif rajt lil dan il-club jinbidel tul is-snin?
Bħal kull club ieħor ikollok tlajjiet u nżul, iżda l-akbar sfidi tagħna dejjem ikunu il-finanzi.
Meta jaslu l-unuri dejjem tara dak l-entużjażmu u ferħ iżda meta jkollok il-mument diffiċli n-nies jisparixxu.
Il-club kellu mumenti sbieħ fl-istorja u dejjem ipproduċa tfal li isimhom huwa kbir fil-logħba tal- waterpolo. Issa jmiss li nkompli nara l-club jinbidel billi naslu li nibnu pixxina tal-aqwa livell kif tassew jixirqilna.
Apparti li l-isport m’għadux passatemp, illum hemm aktar professjonalitá u ovvjament il-club wettaq tibdil enormi biex jibqa’ fost l-aħjar clubs f’pajjiżna.
X’appoġġ issib minn sħabek il-membri tal-kumitat?
Iż-żminijiet jinbidlu ħafna u anke l-membri minn żmien għal żmien.
Fortunatament dejjem rajt rispett kbir u sapport anke f’mumenti fejn ma qbilniex.
Min jafni personalment jaf kif naħdem jien u għalhekk diffiċli biex ma jaħdmux miegħi. Iżda nistqarr li kien hemm min ġie b’interess personali u mhux biex ġenwinament jgħin u jagħti kontribut, iżda dawn in-nies ma jdumux jaħdmu miegħi. Jien hemm dejjem għall-club u mhux għalija nnifsi.
X’taħseb li kien is-sigriet tas-suċċess biex Marsaskala rritornaw fil-Premier wara 16-il sena?
Aktar professjonalitá u dixxiplina. Il-magna ta’ dan is-suċċess hija żgur mertu tal-bravu coach Arpad Babay li rnexxielu fi żmien sena biss jibdel il-mentalitá ta’ bosta players.
Hemm ukoll numru ta’ players żgħażagħ li għandhom futur sabih u ħadmu flimkien biex dan seta’ jseħħ … apparti aktar xogħol ta’ amministrazzjoni, speċjalment biex tiġbor ċerti finanzi. Din kienet sena partikolari wara l-pandemija u żgur li kienet ferm aktar iebsa għalina.
X’sehem kellu l-coach Arpad Babay f’dan kollu?
Huwa l-moħħ tat-team u l-pjan ta’ Arpad flimkien magħna hu li nibqgħu nissudaw. Huwa dawwar il-mod u l-istrategija minn isfel għal fuq.
Issa wkoll bis-saħħa tiegħu u l-kuntatti li għandu ser inkunu qed naraw xi żgħażagħ li ser imorru għal taħriġ barra l-pajjiż fi żmien qrib.
Player li kien strumentali biex ksibtu r-rebħa deċisiva kontra Exiles kien bla dubju Mark Carani. X’tikkummenta fuq dan il-player?
Mark hu prodott ta’ Sliema u din is-sena kien fil-pjan tagħna mill-bidu nett. Mark kellu staġun tajjeb ħafna is-sena l-oħra ma’ Ta’ Xbiex u għajnejna mill-ewwel marru fuqu.
Żgur li Mark għandu future mill-isbaħ quddiemu u ma’ Arpad konvint li ser ikompli jikber u jiżviluppa t-talent tiegħu.
Minbarra l-waterpolo, Mark huwa bniedem b’karattru tal-ġenn u edukattissimu. J’Alla t-tfal żgħar iħarsu lejh u jsegwu l-passi tiegħu.
Kif inhu għaddej il-proġett tal-pixxina ta’ Marsaskala?
Bl-iskossi. Ma nixtieqx li ninstema negattiv peró kieku kont bniedem li naqta’ qalbi ilni li ċedejt l-armi.
Trid tibki u titkarrab kuljum għax sfortunatament dik hi s-sisitema f’pajjiżna. Biss konvint li ser naslu u nibdew biex din il- ħolma ssir realtá.
X’inhuma l-opinjoniiet tiegħek fuq il-Pixxina Nazzjonali f’Tal-Qroqq?
Meta jkollok dgħajsa li għandha bżonn manutenzjoni ma tistax tibqa’ tgħabbi nies fuqha għax iċ-ċansijiet ikunu li tegħreq u hekk qed nara li ser jiġri b’din il-pixxina.
Qegħdin nġebbdu kollox bħal-lastiku. Irridu nammettu li l-isport akwatiku kiber, kif ukoll kiseb suċċessi kbar fl-aħħar snin u dan ressaq aktar nies lejna.
Min-naħa l-oħra naħseb li l-Gvern għaraf l-importanza li hawn u proprju għalhekk qed naraw aktar proġetti proposti fil-clubs kif ukoll fil-Kottonera.
Li hu żgur huwa li din il-pixxina trid tingħalaq wara li jkun hemm għażliet oħra b’mod temporanju biex tingħata l-manutenzjoni li għandha bżonn.
Kif jirnexxielek tlaħħaq max-xogħol tiegħek u mal- waterpolo?
Jien kbirt mal-club u l-club kiber mieghi, allura l-club hu parti kbira minn ħajti.
Ma nimmaġinanix mingħajr il-club. Jien bdejt ta’ etá żgħira u kont għadni ġuvni, għaddejt bħal kull bniedem ieħor minn ħafna esperjenzi f’ħajti, tgħarrast, iżżewwiġt, kelli t-tfal, biss il-club baqa’ miegħi u jien bqajt miegħu.
Illum li għandi lil uliedi mdaħħlin sew fl-isport akwatiku qed jagħtini aktar enerġija u saħħa li nkompli naħdem, għax naturalment dak li qed nagħmel mhux biss qed nagħmlu għall-club u għal-lokalitá tiegħi biss ukoll qed nagħmlu għall-futur ta’ wliedi.
Taqbel mas-sistema tal-play-offs, għalkemm dan l-istaġun ma ġietx utilizzata?
Iva. Biss nistqarr li l-opinjoni personali tiegħi u llum ferm aktar minn qatt qabel, naqbel li wara li jkun hemm ir-round preliminari, il-kategoriji għandhom ikunu tlieta.
L-ewwel ikollok l-aqwa tliet clubs li qed jiġġieldu għall-ogħla titlu, u t-tieni jkollok il-clubs ta’ nofs il-klassifika li jilagħbu bejniethom għal titlu bħall- Ewwel Diviżjoni.
It-tielet, it-timijiet ta’ isfel ikollhom ċans ukoll għall-unuri u jkun bħat-Tieni Diviżjoni. Hekk inkunu qed nagħtu aktar opportunitajiet biex clubs jilagħbu fil-livelli tagħhom u ma nibqgħux naraw riżultati bħal 20-5 fost oħrajn.
Tista’ tgħaddi messaġġ lill-partitarji kollha ta’ Marsaskala biex jibqgħu wara t-team tagħhom?
Aktar milli messaġġ lill-partitarji, għax dawk fortunatament dejjem wara t-team u dejjem warajja u jafu eżatt fejn nixtieq inwassal lil dan il-club, nixtieq li nwassal messaġġ lill-grupp żgħir ta’ residenti li qed jagħmlu ħsara kbira lill-club.
Nemmen li kulħadd għandu dritt għall-opinjonijiet tiegħu, kif ukoll delizzji diversi.
Nagħmel appell biex dawn in-nies jieqfu jgergru u joġġezzjonaw għal kull manuvra li tiġi proposta fil-lokalitá tagħna biex ikollna waħda fost l-aqwa pixxini fil-gżira tagħna.
Jien idejquni ħafna affarijiet, biss dejjem irrispettajt id-deċiżjonijiet u l-opinjonijiet ta’ ħaddieħor b’umiltá kbira.
Qatt m’għamilt ħsara lil ħadd u anzi jien qiegħed hemm biex ngħin. Saħansitra taqla’ fuq wiċċek u jħammġuk. Nemmen li fl-aħħar mill-aħħar jirbaħ is-sewwa u min għandu raġun.
Il-club ilu jeżisti mill-1927 u dawk li qed joġġezzjonaw u jgergru ġew biss ftit snin ilu u għax xtraw flat b’veduta ħasbu li xtraw Marsaskala u l-baħar tal- madwar.
Ħarsu lejn lokalitajiet oħra u tpaxxew bl-investiment li sar u aħna ngergru u neqirdu għax ma nixtiqux żvilupp għall-ġid tal-komunitá kollha u l-futur għal dawk li jridu jiġu warajna.
