Meta kompla jiġi diskuss l-abbozz ta’ liġi li jemenda l-Att dwar l-Immigrazzjoni, id-Deputat Laburista Deo Debattista qal li din hija liġi li taħseb biex tirregola l-immigrazzjoni billi nnaqqsu t-tbatija tan-nies li jgħaddu minn dan il-proċess.
Huwa qal li ma teżistix biss immigrazzjoni illegali. Qal li f’pajjiżna l-popolazzjoni żdiedet b’madwar b’100,000 persuna u fost dawn hemm immigranti legali. Qal li fis-snin li ġejin mhux qed nistennew li dan il-fenomenu jonqos.
“Nagħmlu x’nagħmlu liġijiet, irridu nagħmlu xi ħaġa li ngħinu lil dawn in-nies iżda fl-istess ħin naraw li ma jkollhomx għalfejn jaslu għall-immigrazzjoni. Irridu naraw bħala Ewropa kif nistgħu ngħinu biex inrażżnu l-konsegwenzi ta’ din l-immigrazzjoni illegali. Inrażżnuha mhux billi nibnu ħitan, ma nħalluhomx jiġu jew naħsbu fuq il-konsegwenzi barra l-aspett ekonomiku, l-aspett uman u l-konsegwenzi kollha tiegħu.”
Debattista qal li “Bħala Ewropa għandna l-obbligu li ninvestu aktar f’dawn il-pajjiżi kemm mill-aspett edukattiv, dak tas-saħħa, u l-infrastruttura biex il-problema nittrattawha at source u mhux nittrattaw il-konsegwenzi.”
