Is-Super League Ewropew stabbilixxa pjani ġodda biex jissostitwixxi l-UEFA Champions Lague b’kompetizzjoni li tkun komposta bejn 60 u 80 team.
L-aħħar idea kienet tara lil kull club involut jilgħab minimu ta’ 14-il logħba kull staġun, mingħajr ebda membru permanenti.
Din it-tħabbira saret mill-kumpanija Ewropea għall-iżvilupp tal-isports “A22” – li hija bbażata f’Madrid.
Dan qed iseħħ fost tilwima legali li għaddejja bejn il-UEFA u t-tliet clubs li fadal fis-Super League Ewropew – Real Madrid, Barcelona u Juventus – idea li ġiet annullata fi żmien tlett ijiem wara l-protesti li saru mill-partitarji, f’April 2021.
A22 jsostnu li l-idea għall-formazzjoni tal-kompetizzjoni l-ġdida ġejja wara diskussjonijiet ma’ clubs madwar l-Ewropa dwar id-diffikultajiet ekonomiċi tagħhom.
Madankollu, għadu mhux magħruf kif Real, Barca jew Juventus se jagħmlu post għal timijiet ġodda fi ħdan l-istruttura, jew saħansitra min imexxi l-kampjonat.
A22 kkritikaw bl-aħrax lill-UEFA u ddeskrivew il-bażi għall-”10 prinċipji tagħhom għal kampjonat tal-football Ewropew”.
Huma qalu: “Kampjonat tal-football Ewropew għandu jkun kompetizzjoni miftuħa u multidiviżjonali b’60 sa 80 team, li tippermetti distribuzzjoni sostenibbli tad-dħul madwar il-piramida.
“Il-parteċipazzjoni għandha tkun ibbażata fuq mertu sportiv annwali u m’għandux ikun hemm membri permanenti.
“Kwalifiki miftuħa bbażati fuq prestazzjoni domestika tagħti aċċess lill-clubs li qed jiksbu postijiet għoljin fil-kampjonati domestiċi.
Din hija “u-turn” kbira mill-prinċipji oriġinali li raw lill-”Imsieħba Fundaturi” jaqsmu somma ta‘ £3 biljuni u garanzija ta’ £130 miljun f’kull staġun.
Il-membri oriġinali tas-Super League kienu Real Madrid, Barcelona, Atletico Madrid, Juventus, Milan, Inter, Manchester United, Liverpool, Manchester City, Chelsea, Arsenal u Tottenham.
