Raġel sofra minn ġrieħi wara li għall-ħabta tad-9:15 a.m kien involut f’inċident li seħħ fiċ-Ċentru tal-Fieri u l-Konvenzjonijiet ta’ Malta f’Ta’ Qali.
Il-Pulizija tad-Distrett marru mill-ewwel fuq il-post u minn investigazzjonijiet preliminari li saru rriżulta li r-raġel ta’ 52 sena residenti l-Fgura kien weġġa’ wara li waqa’ minn fuq container waqt li kien qiegħed jagħmel xi xogħol.
Fuq il-post issejħet ambulanza li ħadet lir-raġel l-Isptar Mater Dei sabiex jingħata l-kura meħtieġa. Aktar tard, huwa ġie ċċertifikat li qiegħed isofri minn ġrieħi gravi.
L-investigazzjonijiet tal-Pulizija dwar dan l-inċident għadhom għaddejjin.
