Saret b’suċċess l-ewwel operazzjoni fuq il-moħħ f’pajjiżna permezz tat-tim ta’ speċjalisti f’Mater Dei. ‘Awake Craniotomy’ hija operazzjoni speċjali fil-moħħ li ssir sabiex jitneħħew tumuri jew leżjonijiet fil-moħħ b’mod sikur, filwaqt li jinżammu l-funzjonijiet importanti bħall-ħsieb, il-memorja, r-rikonoxximent tal-emozzjonijiet u l-moviment fost oħrajn.
Il-Ministru għas-Saħħa u l-Anzjanità Attiva Jo Etienne Abela spjega li dan l-intervent qed isir b’appoġġ ta’ monitoraġġ u testijiet waqt l-operazzjoni. Qal kif b’dan il-mod, it-tobba jistgħu jneħħu kemm jista’ jkun mill-leżjoni jew tumur mingħajr ma jagħmlu ħsara lill-funzjonijiet importanti tal-moħħ. Dan jgħin biex jitjiebu r-riżultati fit-tul, jiżdied iċ-ċans ta’ sopravivenza waqt li titejjeb l-kwalità tal-ħajja u il-pazjenti jkunu jistgħu jirritornaw għax-xogħol.
Il-Ministru Abela qal li issa pajjiżna għandu tim speċjalizzat fl-Isptar Mater Dei biex jagħmel dawn l-operazzjonijiet. Saħaq li dan hu pass importanti ħafna għaliex permezz ta’ din l-operazzjoni, issa pazjenti ser ikunu qed jiġu kkurati f’Malta qrib il-familji tagħhom. Permezz ta’ din l-operazzjoni qed jiġi iffaċilitat l-proċess tal-fejqan filwaqt li jonqos il-ħin bejn l-operazzjoni u trattamenti oħra bħall-kimoterapija jew radjoterapija. Dan kollhu waqt li qed jinżammu l-istess standards għoljin ta’ kura.
“Nirringrazzja lil Dr Jasmina Djukic u lit-tim ta’ professjonisti fl-Isptar Mater Dei. Din il- qabża ta’ kwalita fil-kura tas-saħħa tfisser li l-pazjenti issa qed jibbenefikaw billi jingħataw kura f’pajjiżna stess mingħajr jintbagħtu pazjenti barra minn Malta. Fl-istess ħin, l-ispeċjalisti tagħna jispecjaliżaw aktar u jkomplu jtejbu l-kura għall-ġenerazzjonijiet futuri,” temm jgħid Dr Abela.