It-Tim tal-Water Polo tan-Nisa ta’ Sirens reġa’ niżżel ismu fil-kotba tal-istorja billi kiseb it-titlu tal-Kampjonat BOV Water Polo għall-ħames sena konsekuttiva.
B’erba’ punti inqas mir-rivali tagħhom Sliema fil-Kampjonat BOV taċ-Ċentinarju tal-ASA, fl-aħħar ġimgħa tal-logħob, Sirens kellhom bżonn miraklu biex iżommu t-titlu tagħhom. Dak il-miraklu ġie fil-forma ta’ rimonta impressjonanti kontra r-rivali tagħhom ta’ żmien twil Sliema.
B’riżultat ta’ 9-5 minn taħt fi tmiem it-tielet sessjoni, Sirens urew reżiljenza u determinazzjoni straordinarji, biex dawru r-riżultat f’rebħa ta’ 10-9.Sirens temmew il-ġimgħa b’rebħa drammatika oħra kontra San Giljan.
San Giljan bdew b’saħħithom billi ħadu vantaġġ kmieni ta’ 2-1 u baqgħu minn fuq sat-tielet sessjoni tal-logħba fejn Sirens finalment ġabu l-iskor indaqs ta’ 7-7. Imbagħad marru minn fuq 9-7 grazzi għal żewġ gowls minn Kendra Navarro.
Profokieva ta’ San Giljan naqqset id-distakk għal 9-8 b’Margarita Plevritoua tiskorja l-aħħar gowl tat-tielet sessjoni għal Sirens biex għalqu l-iskor 10-8.Gowls minn Plevritou u Martha Perici Ferrante kabbru l-vantaġġ ta’ Sirens fir-raba’ sessjoni b’Elena Borg tiġbed gowl lura għal San Giljan biex tagħmel l-iskor 12-9.
Kendra Navarro reġgħet tat lil Sirens vantaġġ ta’ 4 gowls meta kien fadal 3:23 fuq l-arloġġ. Sirens ikkontrollaw il-logħba u ssiġillaw il-kampjonat fil-100 Anniversarju tal-Assoċjazzjoni tal-Isport Akkwatiku ta’ Malta.
Huma fit-triq it-tajba biex jirbħu l-unuri domestiċi kollha dan l-istaġun wara li diġà rebħu l-kampjonat BOV tax-Xitwa aktar kmieni din is-sena u se jiffaċċjaw lil San Giljan fil-finali tal-Kompetizzjoni BOV knockout kmieni l-ġimgħa d-dieħla.
Ir-rebħa tal-kampjonat ġiet iċċelebrata bi stil, b’Charles Azzopardi, Kap tas-CSR fil-Bank of Valletta, u Karl Izzo, President tal-ASA u Caroline Schiavone, ko-ordinatriċi tal-Water Polo tan-Nisa ppreżentaw trofew kommemorattiv uniku liċ-ċampjins ġodda inkurunati.
Ikkummissjonat mill-Bank of Valletta biex jimmarka ċ-ċentenarju tal-ASA, it-trofew issa se jieħu post ta’ unur mad-diversi trofej oħra ta’ Sirens.Is-sħubija bejn il-Bank of Valletta u l-ASA tirrifletti l-impenn fit-tul tal-Bank lejn l-iżvilupp tal-isport akkwatiku u l-Isport in ġenerali f’Malta.
Permezz ta’ appoġġ kontinwu u investiment, il-BOV ikompli jkollu rwol ewlieni fit-tisħiħ tat-talent lokali, fil-promozzjoni tal-eċċellenza sportiva, u fiċ-ċelebrazzjoni ta’ mumenti importanti bħall-100 anniversarju tal-ASA. Din il-kollaborazzjoni tenfasizza d-dedikazzjoni tal-Bank biex jippromwovi l-involviment fil-komunità u l-kburija nazzjonali permezz tal-isport.