Fl-opinjoni tiegħi l-Partit Nazzjonalista dejjem ikkunsidra lill-pensjonant bħal vampir. Jixrob demm l-oħrajn. L-istorja titkellem waħedha. Sa mill-introduzzjoni tal-ewwel pensjoni ‘tax-xjuħ’. Kienu kontriha u vvutaw kontriha għax skont huma dawk il-flus ix-xjuħ kienu jixorbuhom inbid. Tista’ ma tiftakarx li Gvern Nazzjonalista meta kien jiġi biex jikkumpensa għall-ogħli tal-ħajja lill-pensjonanti ma kienx jagħtihom l-kumpens kollu, imma żewġ terzi biss?
Il-pensjonijiet huwa qasam li għall-Partit Nazzjonalista huwa ‘minefield’. Jirfsu fejn jirfsu fih jispoldi taħt saqajhom. Għax huwa qasam li ma jġorr ebda timbru ta’ Gvern Nazzjonalista għajr dak negattiv.
U bil-wiċċ tost kollu jikkritikaw Gvernijiet Laburisti għax imisshom għamlu jew jagħmlu aktar! Innota l-istorja tagħhom u ssib li dejjem SE JAGĦMLU. Qatt ma jgħidu X’GĦAMLU. Wegħdi biss għax il-passat tagħhom ma juri xejn konkret. Il-wiċċ tost tal-Partit Nazzjonalista dwar dan il-qasam reġa’ spikka f’dawn il-ġimgħat li għaddew wara li l-Prim Ministru ħabbar miżura oħra favur il-pensjonanti fejn jirrigwarda taxxi.
Ngħinek ftit tifhem l-ingann Nazzjonalista b’fatti konkreti.
Sas-sena 2015, allura sa sentejn wara li l-Partit Laburista rebaħ l-Elezzjoni Ġenerali ta’ Marzu 2013 u wara tmexxija ta’ 15-il sena minn Gvernijiet Nazzjonalisti, il-pensjonanti kienu jħallsu t-taxxa fuq kull dħul tagħhom, inkluż il-pensjoni kollha.
Bejn l-2016 u l-2021 il-pensjonanti kellhom id-dħul mill-pensjioni sal-ekwivalenti tal-pensjoni massima tas-sigurtà soċjali eżentat minn ħlas ta’ taxxa. Izda f’dan l-istess perjodu fejn kien ikun hemm dħul ieħor dan kien jingħadd mal-pensjoni u kien ikun soġġett għar-rati tat-taxxa normali. Mill-ammont tat-taxxa dovuta fuq id-dħul kollu tal-pensjonant (pensjoni u magħha dħul ieħor) kien jitnaqqas l-ammont ta’ taxxa ffrankat fuq il-pensjoni biss.
Fis-sena 2022 inbeda proċess sabiex mid-dħul taxxabbli tal-pensjonant (pensjoni u magħha dħul ieħor) ikun eżentat 20% tal-pensjoni massima kull sena. It-taxxa kienet tinħadem fuq l-ammont nett li jifdal u mbagħad jitnaqqas l-ammont ta’ taxxa ffrankat fuq il-pensjoni biss. Sas-sena li għaddiet dak il-persentaġġ ittella’ għal 80%.
Dan t’hawn fuq sas-sena li għaddiet. Minn din is-sena qegħdin isiru żewġ passi oħra kif spjegat kif ġej:
- L-eżenzjoni fuq il-pensjoni mibdija fis-sena 2016 issa se titla’ għal €37,104. Dan prattikament ifisser li kull dħul minn pensjoni tas-sigurtà soċjali, pensjoni tas-servizz jew pensjoni privata se jkun eżentat kollu minn ħlas ta’ taxxa. Dan kien mill-bidunett l-iskop ta’ din l-eżenzjoni. Sadattant wieħed għandu jżomm f’moħħu li minn din is-sena se jibdew jitħallsu pensjonijiet privati lil dawk il-pensjonanti li investew f’dawn l-iskemi.
- Dak li issa se jkun soġġett għar-rati tat-taxxa normali huwa biss id-dħul l-ieħor (eskluż pensjonijiet). Dan ifisser li minbarra l-eżenzjoni tal-pensjoni, min hu b’komputazzjoni singola mhux se jħallas taxxa fuq l-ewwel €12,000 minn dħul ieħor. Min hu b’komputazzjoni ta’ miżżewweġ mhux se jħallas taxxa fuq l-ewwel €15,000 minn dħul ieħor.
Ngħinek bi ftit eżempji ta’ x’ifisser dan kollu.
Ġanni huwa pensjonant b’komputazzjoni singola. Din is-sena se jdaħħal €20,000 pensjoni u €12,000 dħul ieħor. Bir-regoli tat-taxxa kif kienu fis-sena 2015 Ġanni kien ikollu jħallas €5,275 f’taxxa. Bir-regoli tas-sena 2025 kieku din is-sena Ġanni se jħallas €1,273 f’taxxa.
Bir-regoli ta’ din is-sena, 2026, id-dħul kollu ta’ Ġanni ta’ €32,000 mhux se jkun taxxabbli u għalhekk mhux se jħallas taxxa fuqu. Ifisser li taxxa ffrankata fuq is-sena 2025 kienet tammonta għal €1,273 filwaqt li taxxa ffrankata fuq is-sena 2015 kienet tammonta għal €5,275.
Pawlu huwa pensjonant b’komputazzjoni ta’ miżżewweġ. Din is-sena se jdaħħal €20,000 pensjoni u €15,000 dħul ieħor. Bir-regoli tat-taxxa kif kienu fis-sena 2015 Pawlu kien ikollu jħallas €4,845 f’taxxa. Bir-regoli tas-sena 2025 kieku din is-sena Pawlu se jħallas €464 f’taxxa.
Bir-regoli ta’ din is-sena, 2026, id-dħul kollu ta’ Pawlu ta’ €35,000 mhux se jkun taxxabbli u għalhekk mhux se jħallas taxxa fuqu. Ifisser li taxxa ffrankata fuq is-sena 2025 kienet tammonta għal €464 filwaqt li taxxa ffrankata fuq is-sena 2015 kienet tammonta għal €4,845.
Patist huwa pensjonant b’komputazzjoni singola. Din is-sena se jdaħħal €12,000 pensjoni u €20,000 dħul ieħor. Bir-regoli tat-taxxa kif kienu fis-sena 2015 Patist kien iħallas €5,275 f’taxxa. Bir-regoli tas-sena 2025 kieku din is-sena Patist se jħallas €2,200 f’taxxa.
Bir-regoli ta’ din is-sena, 2026, mid-dħul kollu ta’ Patist ta’ €32,000 se jkollu biss €8,000 taxxabbli li fuqhom se jħallas €1,600 f’taxxa. Ifisser li taxxa ffrankata fuq is-sena 2025 kienet tammonta għal €600 filwaqt li taxxa ffrankata fuq is-sena 2015 kienet tammonta għal €5,275.
Karmenu huwa pensjonant b’komputazzjoni ta’ miżżewweġ. Din is-sena se jdaħħal €12,000 pensjoni u €25,000 dħul ieħor. Bir-regoli tat-taxxa kif kienu fis-sena 2015 Karmenu kieku qed iħallas €5,345 f’taxxa. Bir-regoli tas-sena 2025 kieku din is-sena Karmenu se jħallas €1,760 f’taxxa.
Bir-regoli ta’ din is-sena, 2026, mid-dħul kollu tiegħu ta’ €37,000 Karmenu se jkollu biss €10,000 taxxabbli li fuqhom se jħallas €1,160 f’taxxa. Ifisser li taxxa ffrankata fuq is-sena 2025 kienet tammonta għal €600 filwaqt li taxxa ffrankata fuq is-sena 2015 kienet tammonta għal €4,185.
Nikola huwa pensjonant b’komputazzjoni singola. Din is-sena se jdaħħal €24,000 f’pensjonijiet u €10,000 dħul ieħor. Bir-regoli tat-taxxa kif kienu fis-sena 2015 Nikola kieku din is-sena qed iħallas €5,775 f’taxxa. Bir-regoli tas-sena 2025 kieku din is-sena Nikola se jħallas €1,773 f’taxxa.
Bir-regoli ta’ din is-sena, 2026, id-dħul kollu ta’ Nikola ta’ €34,000 mhux taxxabbli u għalhekk m’hu se jħallas xejn f’taxxi. Ifisser li taxxa ffrankata fuq is-sena 2025 kienet tammonta għal €1,773 filwaqt li taxxa ffrankata fuq is-sena 2015 kienet tammonta għal €5,775.
Abram huwa pensjonant b’komputazzjoni ta’ miżżewweġ. Din is-sena se jdaħħal €24,000 minn pensjonijiet u €14,000 dħul ieħor. Bir-regoli tat-taxxa kif kienu fis-sena 2015 Abram kieku qed iħallas €5,595 f’taxxa. Bir-regoli tas-sena 2025 kieku din is-sena Abram se jħallas €1,083 f’taxxa.
Bir-regoli ta’ din is-sena, 2026, id-dħul kollu ta’ Abram ta’ €38,000 mhux taxxabbli u għalhekk m’hu se jħallas xejn f’taxxi. Ifisser li taxxa ffrankata fuq is-sena 2025 kienet tammonta għal €1,083 filwaqt li taxxa ffrankata fuq is-sena 2015 kienet tammonta għal €5,595.
Andrew huwa pensjonant b’komputazzjoni singola. Din is-sena se jdaħħal €24,000 minn pensjonijiet u €15,000 dħul ieħor. Bir-regoli tat-taxxa kif kienu fis-sena 2015 Andrew kieku din is-sena qed iħallas €7,025 f’taxxa. Bir-regoli tas-sena 2025 kieku din is-sena Andrew se jħallas €3,023 f’taxxa.
Bir-regoli ta’ din is-sena, 2026, mid-dħul kollu tiegħu ta’ €39,000 Andrew se jkollu biss €3,000 taxxabbli u fuqhom se jħallas €450 f’taxxa. Ifisser li taxxa ffrankata fuq is-sena 2025 kienet tammonta għal €2,423 filwaqt li taxxa ffrankata fuq is-sena 2015 kienet tammonta għal €6,575.
Albert huwa pensjonant b’komputazzjoni ta’ miżżewweġ. Din is-sena se jdaħħal €24,000 minn pensjonijiet u €20,000 dħul ieħor. Bir-regoli tat-taxxa kif kienu fis-sena 2015 Albert kieku qed iħallas €7,095 f’taxxa. Bir-regoli tas-sena 2025 kieku din is-sena Albert se jħallas €2,583 f’taxxa.
Bir-regoli ta’ din is-sena, 2026, mid-dħul kollu tiegħu ta’ €44,000 Albert se jkollu biss €5,000 taxxabbli u fuqhom se jħallas €210 f’taxxa. Ifisser li taxxa ffrankata fuq is-sena 2025 kienet tammonta għal €2,373 filwaqt li taxxa ffrankata fuq is-sena 2015 kienet tammonta għal €6,885.
META u JEKK il-Partit Nazzjonalista jwegħdek aktar minn hekk fakkru li meta kellu ċans jattwa, lill-pensjonant ma kkalkulahx.
Grazzi PL ghax kont int li meta Dr Boffa kien kap tal MLP ghamilt il penzjoni ghalk anzjani.Il PARTIT NAZZJONALISTA IVVOTA KONTRIJA.Dan juri kemm il pn ihobb lill haddiem.Isthi ghid fuq il penzjonijiet Delia.