Raġel kellu jiddaħħal l-Isptar wara li aktar kmieni, għall-ħabta tas-6:00 a.m, kien involut f’inċident tat-traffiku fi Pjazza Bertu Fenech, Ħal Balzan.
Minn stħarriġ illli sar irriżulta li raġel ta’ 71 sena residenti Ħal Balzan kien intlaqat minn vann tal-għamla Citroen Berlingo, misjuq minn mara ta’ 39 sena residenti Ħal Qormi.
Ir-raġel ingħata l-għajnuna minn tim mediku, sakemm aktar tard huwa seta’ jittieħed l-isptar b’ambulanza li ssejħet fuq il-post. Aktar tard huwa ġie ċċertifikat li sofra ġrieħi gravi.
L-investigazzjonijiet tal-Pulizija b’rabta ma’ dan il-każ għadhom għaddejjin.
