Il-Malta FA ffirmat ftehim ġdid ma’ IZIBET li jkopri d-drittijiet tal-ismijiet tan-National Amateur League, it-tielet livell fil-piramida tal-Kampjonati Nazzjonali. Is-sħubija tkopri tliet staġuni tan-National Amateur league IZIBET, kif se tkun magħrufa l-kompetizzjoni.
Il-president tal-Malta FA Bjorn Vassallo esprima s-sodisfazzjon tiegħu għall-fatt li għal darb’oħra l-IZIBET wrew il-fiduċja tagħhom fil-logħba lokali, speċjalment f’dan il-livell li l-aktar jolqot lill-komunitajiet fl-ibliet u l-irħula tagħna.
“Dan il-ftehim kummerċjali se jippermetti lin-National Amateur League tibni l-identità tagħha mal-Kampjonat Nazzjonali, li se jkollha l-marka tagħha stess, li tqabbel iż-żewġ saffi l-oħra ta’ fuqha,” tenna Bjorn Vassallo, president tal-Malta FA.
Huwa spjega li: “Id-dħul mill-isponsorizzazzjoni se jitqassam lill-klabbs parteċipanti sabiex jappoġġjaw l-isforzi tagħhom biex iżommu l-komunitajiet impenjati permezz tal-involviment tagħhom fil-klabbs rispettivi tagħhom”.
Il-Kap Uffiċjal Kummerċjali ta’ IZIBET Franco Degabriele, iddikjara li IZIBET kienet eċċitata ħafna li tibda din is-sħubija ġdida ta’ sponsorizzazzjoni mal-Assoċjazzjoni, wara sponsorizzazzjoni ta’ suċċess kbir tal-FA Trophy s-sena l-oħra. L-isponsorjar tal-Lega Nazzjonali kienet opportunità oħra għall-kumpanija biex tappoġġja l-futbol tal-komunità u tifforma parti integrali mill-Karta tar-Responsabbiltà Soċjali Korporattiva tal-kumpanija.
“L-intenzjoni tagħna hija li nappoġġjaw lill-klabbs fil-livell tal-komunità lokali hekk kif qed jiffaċċjaw l-isfidi serji tal-finanzjament tal-istrutturi tagħhom sena wara sena. Il-ħidma li ssir mill-voluntiera fil-livell tal-komunità teħtieġ l-appoġġ kollu li tista’ tikseb u aħna kburin li qed ngħinu din l-inizjattiva għas-snin li ġejjin,” qal Franco Degabriele – Uffiċjal Kap Kummerċjali tal-IZIBET
Dan huwa t-tielet staġun tan-National Amateur League fil-format tiegħu. L-ewwel rebbieħa kienu Luqa St Andrew’s li kisbu l-ewwel post fil-klassifika tan-National Amateur League B biex kisbu promozzjoni awtomatika u komplew għelbu kemm lil Mġarr United kif ukoll lil Melita fil-Kampjonat Play-offs biex għollew it-tazza.
Zurrieq ġew inkurunati rebbieħa tan-National Amateur League tal-istaġun 2021/22, wara li għelbu lil Attard f’decider tant mistenni. Zurrieq rebħu kampjonat kumbattut ta’ Grupp B, filwaqt li Attard rebħu Grupp A u kien hemm bżonn decider biex jiġi determinat ir-rebbieħ ġenerali quddiem folla mdaqqsa.
L-istaġun 2022/23 jara 11-il tim fi Grupp A u 10 fi Grupp B. Ir-rebbieħ ġenerali ta’ kull grupp jiġi promoss awtomatikament iżda se jkun meħtieġ decider biex jiddetermina min se jkun iċ-champion ġenerali.