Raġel ta’ 48 sena mill-Gżira tressaq il-Qorti fejn ammetta li ta daqqa ta’ ras lil uffiċjal tal-pulizija u beżaq fuq uffiċjali oħra f’Paceville fis-sigħat bikrin tal-Ħadd filgħodu.
Agrippino Felice kien mixli li ħebb għal tliet uffiċjali tal-pulizija, li insulentahom jew heddidhom, li wettaq reat fil-konfront tagħhom waqt li kienu qed jaqdu dmirijiethom, li weġġa’ ħafif kuntistabbli tal-pulizija, li kiser il-paċi pubblika, li kien fis-sakra b’mod li ma kienx kapaċi jieħu ħsieb tiegħu nnifsu f’post pubbliku u li m’obdiex l-ordnijiet leġittimi tal-pulizija.
Fil-Qorti ntqal li r-raġel kien mar f’bar f’Paceville ma’ ibnu. Felice jidher li kien urtat meta ibnu ġie avviċinat mill-pulizija dwar kwistjoni mhux relatata u kien hawn fejn kellu xi jgħid mal-uffiċjali. Huwa kien ingħata struzzjonijiet biex jibqa’ bilqiegħda u wara t-tifel kien qallu biex jitlaq mill-bar.
Meta ħareġ barra, ir-raġel allegatament kien ta daqqa ta’ ras lil uffiċjal tal-pulizija u beżaq fuq il-kollegi tiegħu meta ppruvaw iżommuh. Waqt li kien se jiddaħħal fil-karozza tal-pulizija, Felice kien ukoll ta daqqa ta’ sieq fuq wiċċ uffiċjal.
L-inċident kien inqabad fuq il-body cams tal-uffiċjali tal-pulizija. Huwa tressaq ilbieraħ fil-Qorti fejn ammetta l-akkużi u kien ikkundannat 18-il xahar ħabs sospiżi għal sentejn. Huwa kien ukoll immultat €4,000.
Il-Qorti preseduta mill-Maġistrat Claire Stafrace Zammit ħarġet ordni ta’ trażżin għal perjodu ta’ sentejn favur l-uffiċjali li ħebb għalihom.
Il-Qorti wissiet lil Felice li jekk jikser l-ordni ta’ trażżin jista’ jeħel multa addizzjonali ta’ €7,000 jew sa sentejn ħabs, jew kemm multa kif ukoll priġunerija.
Il-Prosekuzzjoni tmexxiet mill-Ispettur Brian Xuereb. L-Avukat Alfred Abela deher għal Felice.
