Raġel ta’ 26 sena wieġeb ħati li wettaq serqa b’sikkina minn ħanut fix-Xgħajra l-ġimgħa li għaddiet.
Fil-Qorti nstema’ kif nhar l-20 t’Awwissu, għall-ħabta tal-10.00 p.m., il-Pulizija ġiet infurmata b’serqa minn ħanut fix-Xgħajra.
Il-Prosekuzzjoni qalet li l-imputat kien daħal fil-ħanut, ħareġ sikkina u talab il-flus lil wieħed mill-ħaddiema. Wara li l-ħaddiem tah il-flus, l-allegat aggressur ħarab minn fuq il-post. B’kollox kienu nsterqu madwar €180.
Waqt l-investigazzjoni, uffiċjali mid-Dipartiment tal-Investigazzjonijiet Kriminali eżaminaw filmati tas-CCTV tal-ħanut u nnutaw tattoo fuq id il-persuna li wettqet is-serqa, li għenithom jidentifikaw lis-suspettat.
L-investigaturi stabbilixxew ukoll li wara li telaq mill-ħanut, l-imputat allegatament mar fir-residenza tiegħu fix-Xgħajra.
Id-difiża ma kkontestatx il-validità tal-arrest.
L-imputat, li jaħdem bħala skrivan fl-Isptar Mater Dei, wieġeb ħati tal-akkużi.
Fid-dawl tal-ammissjoni bikrija tiegħu, il-Prosekuzzjoni ssuġġeriet li l-Qorti timponi piena minima ta’ ħabs effettiva, filwaqt li rreferiet għall-fatt li fis-serqa ntużat sikkina.
Il-Prosekuzzjoni talbet ukoll li tinħareġ ordni ta’ trattament, filwaqt li argumentat li l-imputat għandu bżonn aktar għajnuna. Il-Qorti semgħet li huwa kien diġà beda programm iżda telaq minnu, u li għandu problemi prinċipalment relatati mal-alkoħol, kif ukoll xi problemi relatati mad-droga u problemi soċjali.
Id-difiża ma oġġezzjonatx għal ordni ta’ trattament, filwaqt li saħqet li huwa importanti li l-imputat jingħata l-għajnuna li għandu bżonn, anke fid-dawl tal-età tiegħu.
L-imputat ma ngħatax il-ħelsien mill-arrest u baqa’ jinżamm taħt arrest.
Il-Prosekuzzjoni tmexxiet mill-Ispetturi Keith Rizzo, Lydon Zammit u Chantelle Mifsud, assistiti mill-Avukat Martina Calleja mill-Uffiċċju tal-Avukat Ġenerali. L-Avukat Alexia Vassallo dehret għall-imputat.