L-espert tal-Qorti Keith Cutajar ikkonferma illi l-eks Ministru Nazzjonalista u Avukat tal-ghaqda Repubblika Jason Azzopardi pprova jagħmel kuntatt miegħu ftit jiem qabel saret it-tfittxija fid-dar tal-eks Prim Ministru Joseph Muscat. Cutajar żied li Azzopardi ma pprovax jagħmel kuntatt miegħu biss iżda pprova jikkuntattja anki uffiċjali tal-pulizija.
Cutajar kien qieghed jixhed fil-proċeduri illi hemm quddiem il-Magistrat Rachel Montebello b’rabta mal-inkjesta tal-isptarijiet kontra Dr Muscat u numru ta’ persuni oħra. Mistoqsi mill-Avukat Vince Galea illi qed jidher għall-eks Prim Ministru kemm-il darba rċieva telefonati mingħand Azzopardi, l-espert l-ewwel wieġeb iktar minn darba mbagħad qal li ċempillu ħames darbiet. Cutajar qal li huwa lanqas kellu numru ta’ Azzopardi fil-mobile tiegħu, iżda meta wera n-numru lill-Maġistrat Gabriella Vella, kienet hija li identifikat in-numru u qaltlu li dak kien in-numru tal-Avukat ta’ Repubblika.
L-espert qal illi huwa ma weġibx għat-telefonati kemm għaliex kien qiegħed isuq il-mutur iżda anki għaliex wara l-ftuħ tal-inkjesta bdew jidhru diversi artikli fil-gazzetti li fi kliemu għamluh iktar konxju ta’ kif iġib ruħu. Cutajar spjega kif meta ma weġibx it-telefonati ta’ Azzopardi, dan tal-aħħar beda jibgħatlu l-messaġġi bis-sistema signal. Mistoqsi x’kien fihom dawk il-messaġġi, l-espert tal-Qorti l-ewwel wieġeb li ma jiftakarx għaliex għadda ż-żmien mbagħad qal li kienu jgħidu xi ħaġa fis-sens li Azzopardi qallu biex iċempillu għaliex ried ikellmu.
L-Avukat Galea staqsa lil Cutajar x’għamel wara li rċieva dawn il-messaġġi, bix-xhud jgħid li huwa mar bihom għand il-Maġistrat Gabriella Vella. Mistoqsi mill-Avukat Galea jekk il-Maġistrat Vella talbitx li tinżamm kopja ta’ dawn il-messaġġi fid-dokumentazzjoni relatata mal-inkjesta, l-espert wieġeb le. Żied li eventwalment kellha tinbidel id-data ta’ meta saret it-tfittxija fid-dar ta’ Dr Muscat.
L-espert intalab mill-Avukat Galea sabiex jiċċekkja dak il-ħin il-mobile phone tiegħu bil-għan li jara jekk il-messaġġi ta’ Jason Azzopardi għadhomx hemm. Ix-xhud ħa ftit tal-ħin biex jagħmel dan, imbagħad qal illi ċ-chat ma’ Azzopardi hija vojta. Wara ħafna mistoqsijiet mill-Avukat Galea sabiex jgħid għaliex dawn il-messaġġi m’għadhomx fuq il-mobile tiegħu, Cutajar stqarr illi huwa ssettja s-sistema tiegħu ta’ signal b’mod li wara ċertu żmien il-messaġġi jitħassru waħedhom.
Iktar qabel Cutajar ippreżenta lill-Qorti rapport dwar xogħol li huwa għamel fuq il-mobile phone tal-eks Prim Ministru bil-għan li l-informazzjoni li ġabar tingħata lill-prosekuzzjoni magħmula minn avukati mill-Uffiċċju tal-Avukat Ġenerali u lill-Avukati tad-Difiża.
L-Avuat Vince Galea talab li informazzjoni fil-mobile li mhix relatata mal-inkjesta ma tingħatax la lill-Prosekuzzjoni u lanqas lid-Difiża. Żied li jekk hemm xi informazzjoni relatata din tista’ tingħata mingħajr problema. Jekk ma jsirx hekk, sostna l-Avukat Galea, se tkun qed issir biss fishing expedition għaliex il-prosekuzzjoni suppost li meta ressqet lill-akkużati quddiem il-Qorti, kellha l-provi neċessarji. Żied li fil-kaz ta’ Daphne Caruana Galizia, il-Qorti qabbdet Imħallef irtirat biex jara huwa x’kien hemm bħala informazzjoni privata.
L-Avukat talab lill-Qorti sabiex taħtar espert li jiddetermina huwa r-rilevanza tal-kontenut tal-mobile phone ta’ Dr Muscat għall-proċeduri fil-Qorti b’rabta mal-inkjesta. U sakemm isir dan il-kontenut tal-mobile jibqa’ għand il-Maġistrat Rachel Montebello. Ma’ din it-talba qablu l-Avukati kollha tad-Difiża.
L-Avukati mill-Uffiċċju tal-Avukat Ġenerali oġġezzjonaw bl-Avukat Galea jirrimarka li dawn allura jridu illi anki affarijiet privati u personali tal-familja tal-eks Prim Ministru, li mhumiex relatati mal-inkjesta, isiru pubbliċi. Il-Magistrat Montebello se tagħti d-deċiżjoni tagħha fil-ġranet li ġejjin.
Sadanittant l-espert ewlieni fl-inkjesta Jeremy Harbinson reġa’ ma kienx preżenti biex jixhed, bil-Maġistrat tinforma lill-Avukati tad-Difiża illi l-Ufficċċu tal-Avukat Ġenerali għamel talba sabiex l-espert ewlieni fl-inkjesta Jeremy Harbinson jixhed minn Qorti fir-Renju Unit bl-għajnuna tal-awtoritajiet Ingliżi, permezz tal-video conference b’kollegament mal-Qorti f’Malta. L-Avukat Franco Debono staqsa għaliex qed tkun addotta din is-sistema li mhux normali minflok li x-xhud jiġi Malta u jixhed minn fuq il-pedana, bl-Avukati tal-Uffiċċju tal-Avukat Generali jwieġbu biss li qed jagħmlu dan għaliex Harbinson jgħix barra minn Malta.
