Raġel ta’ 36 sena ġie kkundannat sitt snin ħabs wara li tressaq il-Qorti ta’ Londra akkużat li waqt li kien preżenti għal festin ta’ divertiment, stupra tfajla li attendiet l-istess festin. Fil-Qorti nstema’ kif il-każ imur lura għal sentejn ilu.
Il-Qorti semgħet kif fis-6 ta’ Frar tal-2021, tfajla ta’ 20 sena attendiet l-istess festin li attenda l-akkużat, Marcelle DaCosta, f’Enfield. Intqal kif wara l-festin, fis-sigħat bikrin tal-għada filgħodu, is-7 ta’ Frar, it-tfajla raqdet f’indirizz fejn hemmhekk DaCosta stupraha waqt li kienet rieqda.
Fil-Qorti ta’ Londra, il-Prosekuzzjoni xehdet kif it-tfajla għamlet rapport dwar l-inċident lill-Pulizija Metropolitana ta’ Londra fit-13 ta’ Frar. Immedjatament kif sar ir-rapport, bdiet investigazzjoni mit-tim tal-Protezzjoni Pubblika taż-Żona tat-Tramuntana ta’ Londra. DaCosta ġie arrestat fid-19 ta’ April. Minkejja li huwa kien akkużat li stupra tfajla, huwa ċaħad l-akkużi kollha miġjuba kontrih.
Surġent mit-tim tal-Protezzjoni taż-Żona tat-Tramuntana, Myles Bossman li mexxa l-investigazzjoni qal li bħala individwu DaCosta jista’ jitqies bħala persuna perikoluża, minħabba l-fatt li meta kien qed jiġi mistoqsi mill-Pulizija, ma wera l-ebda rimors għal emilu.
Huwa wassal ukoll messaġġ mingħand il-Korp kollu tal-pulizija ta’ Londra, magħruf ħafna bħala Met Police. Huwa qal; “Il-Met tħeġġeġ lil kull min hu vittma jew xhud ta’ attakk sesswali sabiex jikkuntatja lill-pulizija. Din il-kundanna sservi bħala tfakkira li dawk li jagħmlu reati orribbli bħal dawn se jinstabu u ssir ġustizzja kif suppost’’.
