Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi lejn il-futbol bdiet min meta kont tifel fejn dejjem nibqa’ ngħid li kien l-isbaħ żmien speċjalment fejn konna nistgħu nilagħbu l-ballun fit-triq mingħajr problemi. Bla dubju l-futbol nista’ ngħid li kien parti kbira minn ħajti matul iż-żmien kemm bħala plejer u f’dawn l-aħħar 18-il sena bħala kowċ, fejn nista’ ngħid li rajt tfal jikbru u jiżvilupaw li llum il-ġurnata nħoss sodisfazzjoni li kont parti mill-iżvilupp tagħhom.
Iddeskrivi l-esperjenza preżenti tiegħek bħala kowċ tat-tim nazzjonali ta’ taħt is-17-il sena tan-Nisa.
Li tkun kowċ ta’ skwadra nazzjonali hija diġá xi ħaġa li tagħtik sodisfazzjon u tħoss element ta’ responsabbiltá speċjalment meta taf li qed tirraprezenta lil pajjiżek. L-esperjenza mat-tfajliet ta’ taħt is-17-il sena hija waħda ta’ sodisfazzjon speċjalment meta tara l-impenn u l-qalb li għandhom dawn it- tfajliet speċjalment meta tarahom jagħtu dak kollu li jistgħu u jippruvaw jagħmlu dak kollu li tkun qed taħdem fuqu fiż-żmien qasir li jkollok magħhom biex tipreparahom għall-kompetizjoni li tkun ġejja fejn dejjem ma tkunx faċli għal-livell li ssib,peór meta ġġib xi riżultat pożittiv bħalma ġibna fl-aħħar logħba li lgħabna ġewwa l-Azerbaijan ftit tal-ġranet ilu hija xi ħaġa li tagħtik iktar ħeġġa biex tibqa’ taħdem u tgħin biex tkompli tipprova tgħolli l-livell ta’ dawn it-tfajliet.
Kif tqis il-livell tal-futbol tan-nisa f’pajjiżna fil-preżent?
Il-livell tal-futbol tan-nisa f’Malta nemmen li dejjem qiegħed jikber. Baqagħlna ħafna x’naħdmu peró l-futur huwa wieħed sabiħ. Għandna nibqgħu naħdmu speċjalment fl-etajiet iż-żgħar, nemmen li hemm bżonn li jkun hemm aktar komunikazzjoni bejn il-klabbs u l-MFA biex ninvestu aktar fit-talent li għandna. Meta tilgħab ma’ timijiet barranin, tinduna li għandna xi ħaġa nieqsa fejn irridu nissaħħu.
U dak tal-grawnds fejn il-plejers jilagħbu l-logħob kompetittiv tagħhom?
Fuq livell ta’ grawnds fejn jilagħbu forsi jista’ jkollna faċilitajiet xi ftit aħjar peró nifhem is-sitwazzjoni ta’ ammont kbir ta’ logħob li jiġu organizzati mill- Youth FA (YFA).
Kif qed tħares lejn il-futur tiegħek fil-futbol?
Il-futur tiegħi fil-futbol l-ewwelnett nibqa’ nżomm saqajja mal-art u nara li nibqa’ nitgħallem kull ġurnata kif dejjem kienet il-fehma tiegħi għax għandi responsabbiltá kbira fl-iżvilupp tat-tfal u taż-żgħażagħ, diment li l-Bambin jagħtini s-saħħa nibqa’ nagħti li nista’ b’dedikazzjoni u passjoni kif dejjem għamilt.
Għaddi messaġġ finali speċjalment lil dawk il-bniet u tfajliet li jixtiequ jagħmlu karriera ta’ suċċess fil-futbol.
Il-messaġġ tiegħi jibqa’ dejjem l-istess biex qatt ħadd m’għandu jaqta qalbu anke jekk forsi taħseb li ma tistax tasal, trid tibqa’ temmen fik innifsek, tibqa’ dejjem pożittiv u taħdem iktar b’dedikazzjoni u serjetá!
