L-avukat Joe Brincat, iddikjara ma’ Talk.mt li “jekk inħarsu biss lejn id-distakk inkunu qed nagħmlu żball kbir. Kemm hu veru li nstemghu n-nies?”.
Fil-kummenti tiegħu hu qalilna li “l-voti mitfugħa u dawk li mhux mitfugħa riedu jibagħtu messaġġi differenti. Mhux in-nies li qed jiċċelebraw barra dawn, li ħarġu l-imkatar tal-Labour li hu patrimonju tal-familja tagħhom. Imma hemm ħafna x’wieħed jara. In-nuqqas ta’ voti jidher li mess sewwa mhux biss lill-partit fil-gvern imma wkoll lill-partit fl-Oppożizzjoni, li tfisser li kkonvinċiet xejn. Jidher li Bernard Grech qed jipprova jilqa’ għall-attakki li se jkollu minn ġewwa. Mhux biżżejjed li jgħid li jrid jibqa’. Il-Partit Laburista jrid verament jagħmel dixxiplina fuqu nnifsu. L-għira tagħmel l-effett tagħha. Mhux x’ħadt jien, imma “ara kemm qabillu ħaddieħor.” Jien kont persważ li t-turnout kien se jkun anqas minn 87 fil-mija li kienu qed ibassru s-surveys. Dan għedt fil-programm ta’ One bejn nofs il-lejl u l-ewwel minuta tal-Ħadd qabel ma kienu waslu l-kaxxi kollha fin-Naxxar. Jien bassart ukoll li ż-żewġ partiti se jkun t-tnejn tilfu l-voti mill-aħħar elezzjoni. Minkejja li l-elettorat kiber u minn 341,000 sa 355,000. Jekk inħarsu biss lejn id-distakk inkunu qed nagħmlu żball kbir. Kemm hu veru li nstemghu n-nies?”, itemm jgħid l-avukat Joe Brincat.
